Jump to Navigation

Welcome to Izuba Radio 100 MHz

Radio Izuba is run as a community and educational radio station.
Their strength to the community is in their programming, but also in their commitment to being the leading media institution in community development. Radio Izuba offers the most thorough community participation in both show production and programming.

admin's picture

Umuyobozi w'Akarere ka Kirehe Murayire Protais yeguye

Kuba ubuyobozi bw’akarere ka Kirehe bwimaga ijambo bamwe mubayobozi b’inzego z’ibanze bazaga bagana akarere byatumye uwari umuyobozi w’akarere ka Kirehe Murayire Protais yegura kumirimo ye yo kuyobora aka karere ka Kirehe. Njyanama y’akarere ka Kirehe ikaba ihumuriza abanyakirehe bababwira ko ntagikuba cyacitse imirimo y’akarere izakomeza nkuko byari bisanzwe.

Ahagana mumasaha ya saa kumi nimwe z’umugoroba wo kuri uyu wa mbere nibwo inama idasanzwe ya njyanama y’akarere ka Kirehe yateranye igitaraganya iyobowe n’umuyobozi wa Njyanama Bwana RWAGASANA Erneste. mugihe cy’amasaha nibura agera kuri abiri inama yari imaze gufata umwanzuro kubusabe bwo kwegura k’uwari umuyobozi w’akarere ka Kirehe MURAYIRE Protais. Umuyobozi wa Njyanama y’akarere ka Kirehe Rwagasana aravuga kucyatumye uwayobora akarere ka Kirehe ahitamo kwegura.

Mbere yuko bajya munama kuntara abayobozi ngo bari babujijwe kutagira ikibazo nacyimwe babaza ministry Kaboneka, nkuko twabitangarijwe numwe mubayobozi b’inzego zibanze mukarere ka Kirehe utifuje ko amazina ye ashyirwa ahagaragara.
Umuyobozi wa njyanama akomeza avuga ko ntagikuba cyacitse akazi kagomba gukomeza nkuko bisanzwe.Uwari umuyobozi w’aka ka Kirehe Murayire Protais avuye kumirimo ye amaze hafi imya igera kuri itanda ayobora aka karere.

Elia Byukusenge / Izuba Radio

admin's picture

Abasore  babiri  bafatanije  na nyina  kwivugana ise  , bamushinja amarozi

Abasore babiri harimo uwitwa Kayinamura Lambert wari umaze igihe gito avanywe iwawa, Michel Habiyambere ndetse na nyina ubabyara witwa Kabukobwa Saverina, batawe muri yombi bafungiye kuri sitasiyo ya police ya kirehe bakurikiranyweho kwivugana ise waba basore witwa Ntakumuhana uri mukigero cy’imyaka 65 y’amavuko ba mukekaho amarozi.

Uyu muryango utuye mu mudugudu wa Ruhama, akagari ka Gatarama, umurenge wa Kigina ho mukarere ka Kirehe, ngo urimo abana babiri bafite uburwayi bwo mu mutwe, ndetse n’umwe wabaye ikirara, akaba ari naho aba basore hamwe na nyina bashingira bavuga ko ise ubabyara ariwe wa baroze.

Akaba ari nayo mpanvu mu ijoro ryo ku wa kane tariki ya 16 Ukwakira 2014, ahana ku isaha ya sa ine z’ijoro bahengereye ise atashye bamucira inkoni batangira ku mukubita ba mubwira ko agomba kubabwira impanvu imutera kubaroga nkuko bivugwa ni mwe muri aba basore ariwe Michel Habiyambere ubwo twamusangaga aho afungiye kuri sitasiyo ya police ya kirehe.

Yagize ati ” twafashe inkoni dutangira ku mukubita umubiri wose tumubaza impanvu imutera kuturoga akatugira ibicucu abandi bakaba ibirara ariko yirinda kugira icyo adutangariza atubwira ko ibyo ntabyo azi, twaramuretse ajya kuryama mu masaha ya mugitondo nibwo mama yaje kutubwira ngo papa yapfuye ahita ajya no gutabaza . “

Uyu musore akomeza agira ati ” mu byukuri ibyo twakoze ntabwo twari tubigambiriye akaba ari nayo mpanvu dusaba imbabazi kuko ntabwo twari tuzi ko inkoni twakubise umubyeyi wacu za mutera gupfa. “

Mukiganiro twagiranye n’umunyamabanganshingwabikorwa w’umurenge wa Kigina ,Bihoyiki Leonard, yemeje ibijyanye n’urupfu rw’uyu musaza, akomeza atangaza ko abakurikiranyweho bose kugira uruhare murupfu rwe batawe muri yombi kugira ngo bakorweho iperereza.

Yagize ” ubu aba basore na nyina bafungiye kuri sitasiyo ya police ya kirehe kugira ngo bakorweho iperereza ryimbitse ku cyabateye kwivugana uyu musaza . “

Bihoyiki akomeza atangaza ko abaturage bagomba kujya birinda gushinja abandi amarozi kuko icyemezo cya muganga aricyo cyo nyine gishobora kugaragaza ko umuntu ashobora kuba yarozwe cyangwa akaba afite ubundi burwayi .

Umurambo wa nyakwigwendera wajyanywe kubitaro bikuru by’akarere ka Kirehe kugira ngo ukorerwe isuzuma.

Besabesa Etienne / izuba Radio

admin's picture

Rwamagana:Abayobozi b'inzego z'ibanze numutekano bari mu maboko ya Police ya Nzige

Umuyobozi w’umudugudu wa Byimana, akagari Ka Byimana, umurenge wa Karenge, hamwe n’abashinzwe umutekano muri uyu mudugudu batawe muri yombi bafungiye kuri sitasiyo ya police ya Nzige, aho bakurikiranyweho kwivugana umusore witwa Turatsinze venant w’imyaka 23 y’amavuko bamukekaho ubujura bw’amatungo.

Amakuru dukesha umuyobozi w’u murenge w’umusigire ubusanzwe ushinzwe irangamimirere , Niyonshuti Immacule, yatangaje ko uyu musore wafashwe ubwo yarasanze aba bayobozi bari mu nama barimo gukemura ibibazo by’abaturage babonye uyu musore baramuhamagara kugira ngo yisobanure kubyaha by’ubujura yaregwaga, Aranga maze akizwa n’amaguru ni byo aba bayobozi bahise bamukurikira bamufashe batangira ku mu kubita kugeza apfuye.

Umuvugizi wa police w’ungirije mu ntara y’ iburasirazuba, Inspector Kayigi Emanuel , yemeje ko aba bagabo bakurikiranyweho kwivuga uyu musore batawe muri yombi ndetse anasaba abayobozi kujya birinda kwihanira mugihe hari uwo bakeka ho ibyaha runaka kuko nabo bishobora kubagiraho ingaruka.

Yagize ati ” aba bagabo bafungiye kuri sitasiyo ya police ya nzige aho bakurikiranyweho gukubita umusore witwa turatsinze kugeza apfuye, tukaba dusaba abayobozi kujya birinda kwihanira ahubwo mugihe hari uwo bakekaho amakosa runaka bakamushyikiriza inzego z’ubutabera, naho ubundi kwihanira ntabwo aribyo kuko bishobora kubagira ingaruka. “Mu gihe aba bagabo baba bahamwe niki cyaha cyo kwivugana uyu musore bahanishwa ingingo 140 iri mu gitabo cy’amategeko ahana y’u Rwanda , aho bashobora guhanishwa igihano cya burundu.

Umurambo wa nyakwigendera wajyanwe ku bitaro bikuru byakarere ka Rwamagana kugira ngo ukorerwe isuzuma.

Besabesa Etienne / Izuba Radio

admin's picture

Abacukuzi 36 bagwiriwe n’ikirombe babiri barapfa undi umwe ari mubitaro

Abacukuzi bakorera kompanyi ikora ibikorwa by’ubucukuzi bw’amabuye y’agaciro mu murenge wa Rwinkwavu , yitwa Wolfram mining process company , bagwiriwe n’ikirombe uko bari 36, babiri muri bo bavanywamo bafpuye undi umwe akaba akiri mubitaro bya Rwinkwavu.

Iyi mpanuka yabaye nyuma y’ imvura yaguye kuri uyu wa gatatu tariki ya 15.10.2014, ubwo aba bacukuzi bari mukazi kabo nkuko bisanzwe barimo gushakisha amabuye y’agaciro, nyuma aho bakoreraga haje kunyerera maze icyo kirimbo kirariduka bose kirabagwira, abarokotse bo ngo ni uko bari bakiri hafi batarinjira imbere mu kirombe.

Mukiganiro twagiranye n’umuyobozi w’akarere ka Kayonza, Mugabo john, yatangaje ko ababuze ababo bagiye gufashwa kureba uburyo bahabwa indishyi z’akababaro ku miryango ya babuze ababo kuko wolfram ifite ubwishingize.

Yagize ati ” twaganiriye na wolfram itubwira ko ubu bari mubiganiro bareba ukuntu ababuze ababo bahabwa impozamarira dore ko iki kigo gifite ubwishingizi. “ Mugabo akomeza asaba ibigo bikora ibikorwa by’ubucukuzi bw’amabuye y’agaciro muri aka karere kwitwararika bakubakira neza ibi birombe bacukuramo amabuye y’agaciro kugira ngo birinde ko bishobora kugwira abakozi babo .

Ibi bigo kandi ngo bigomba kujya byubahiriza amabwiriza agenga ubucukuzi, baha abakozi babo imyambaro ibarinda mugihe bari muri aka kazi . Kuruhande rw’umucukuzi ukiri mu bitaro ngo arimo kwitabwaho n’abaganga bo mubitaro bya Rwinkwavu kandi hari ikizere ko ashobora gukira.

Besabesa Etienne / Izuba Radio

admin's picture

Barwiyemezamirimo b’abagore mu nzira yo kwagura ibikorwa byabo bifashishije ikoranabuhanga

Abagore bo muturere dutandukanye two mu ntara y’ Iburasirazuba, bakora ibikorwa by’ubuhinzi, ubworozi ndetse n’ubukorikori, Nyuma yo gutyaza ubwenge ku bijyanye no gutegura neza umushinga, gushaka isoko ndetse n’ ikoranabuhanga biyemeje guhita bavugurura uburyo bakoragamo iyi mishinga yabo bityo bakayijyanisha n’ikoranabuhanga murwego rwo kumenyekanisha ibyo bakora bakanarushaho kwiteza imbere.
Ubwo basozaga amahugurwa y’iminsi itatu yari abahurije hamwe mu karere ka Rwamagana , yateguwe n’umushinga AWEP Rwanda(African’s Women’s Entrepreneurship Program), Aba bagore Bavuze ko bahawe ubumenyi bwisumbuyeho kubwo bari bafite aho beretswe uburyo bwo gutegura neza imishinga mito iciriritse ibyara inyungu, bashishikarizwa uburyo bwo gukorera hamwe muri za koperative ndetse banigishwa gukoresha mudasobwa, bavuga ko ubu bumenyi bahawe buzabafasha kuba bavugurura ibikorwa byabo bakiteze imbere.

Uwamurera Clementine utuye mukarere ka Rwamagana, akora ibikorwa by’ubuhinzi n’ubworozi avuga ko kuba yize gukoresha mudasobwa bizamufasha kuba yamenya uko ibiciro byifashe ku isoko mpuzamahanga yifashishije murandasi (Internet).Yagize ati ” ubu sinzongera kwirirwa nzenguruka njya kubaza ku mahoteli n’ ama resitora mbasaba ko bangurira umusaruro w’ibikorwa byanjye , kuko ubusanzwe byangoraga ntakaza amatike y’imidoka kandi rimwe na rimwe ugasanga nta n’inyungu mbonye , nkuko baduhaye ubu bumenyi nzajya nsoma imbuga za internet zose zo mu rwanda ndetse no mu mahanga ndeba ahantu hari amasoko , ahasigaye najye njye gupiganwa n’ abandi .“Souer Marie Jean Baptize Mukamunana wo mu murenge wa Zaza, ho mu karere ka Ngoma, afite ishuri ry’igisha abana b’abakobwa imyuga , avuga ko nyuma yaho ahawe ubu bumenyi kubijyanye no gutegura neza umushinga ngo ubu bumenyi ntabwo azabwihererana azabugeza no kuri aba bana biga muri iryo shuri.

Yagize ati ” tweretswe ko iyo uteguye umushinga neza ukareba ibyo uzakenera byose hakiri kare ndetse n’inyungu uzakuramo bigufasha kuba utagwa mu gihombo, ubumenyi rero nungutse nzabugeza ku bana biga mu ishuri ryacu ryigisha imyuga itandukanye kugira ngo mugihe barangije kwiga babe bategura neza imishinga yabo bibafashe kwiteza imbere. “
Uwingabiye Murekezi Solange , Akaba ari rwiyemezamirimo , akaba ari nawe watangaga aya mahugurwa kuri aba bagore, atangaza ko icyerekezo isi igezemo ari ugukoresha ikoranabuhanga mu rwego rwo kwagura ibikorwa byabo bikamenyekana ku rwego mpuzamahanga.
Yagize ati ” muri aya mahugurwa twibanze cyane cyane mu kubigisha gukoresha ikoranabuhanga rya mudasobwa kuko aribwo buryo bworoshye bwabafasha kuba bamenyekanisha ibikorwa byabo ku buryo bwihuse, ibi rero bikaza bizabafasha kuba bakwagura ibikorwa byabo .“ Kamanzi Uwizera Gloria uhagarariye AWEP Rwanda, atangaza ko bifuza ko umugore w’umucuruzi yakongerwa ubumenyi mubyo akora akavugurura ubucuruzi bwe akazamuka ndetse akagera ku rwego rushimishije.

Yagize ati ” Turifuza ko abagore b’abacuruzi bagira ubumenyi buhagije mubyo bakora bakabikora nk’umwuga, kandi tuzabafasha kuba twabahuza n’amasoko ku rwego mpuzamahanga. “
Kamanzi akomeza asaba abagore bose guhaguruka bakitabira imirimo ibyara inyungu maze nabo bakagera ku iterambere rirambye.
Umushinga AWEP watangijwe n’abanyamerika biciye muri ambasade y’iki gihugu ubu ukaba ukorera mubihugu 26 byo hirya no hino muri Afurika ukaba ugamije guteza imbere ubucuruzi bw’abagore b’abanyafurika.

Besabesa Etienne / Izuba Radio

admin's picture

Kirehe:Ntibarihuga ukurikiranyweho kwica umugore we yasabiwe gufungwa burundu

Imbere y’imbaga y’abaturage batuye mu mudugudu wa Nyagasozi, akagari ka Ruhanga umurenge wa Kigina, ahakorewe icyaha urukiko rwisumbuye rwa Ngoma, Rwasabiye igihano cya burundu Ntibarihugu Daniel uherutse kwivugana umugore we witwa Mukantwari Violette amukubise isuka mu mutwe.
Iburanisha ry’urubanza ryatangiye umushinjacyaha uyobora ubushinjacyaha ku rwego rwisumbuye rwa Ngoma, ariwe Niwenizeye Javan, asoma ibyaha uregwa akurikiranyweho , aho Ntibarihuga Daniel yemeye akanagaragaza uburyo yivuganyemo uwari umufasha we akoresheje isuka ya macaku .

Mu iburanisha ry’uru rubanza urukiko rwamubajije niba afite umwunganira mu mategeko ahakana avuga ko yagerageje kuvugana nawe ariko biza kwanga kubera impamvu z’amafaranga.
Ariko hagati aho urukiko rwasanze nta mpamvu yo kutaburanisha urwo rubanza kuko uwagombaga kunganira uregwa ariwe maitre Musabwa Frederick ngo yahawe umwanya wo gusoma iyo dosiye.
Gusa urukiko rumubajije icyifuzo cye yavuze ko icyaha acyemera anasaba imbabazi agaragaraza ko ibyo yakoze Atari aziko byari kuviramo urupfu umugore we.
Ariko ngo kubera inyungu z’abana yagize impfubyi kandi bakaba batagira kirera akaba yasabye ko urukiko rwamugabanyiriza ibihano.

Ubushinjacyaha bukaba bwamusabiye igifungo cya burundu no kwishyura amagarama y’urubanza aramutse ahamwe n’icyaha.Uru rubanza ruzasomwa taliki 17.10.2014 ahabereye icyaha mu mudugudu wa Nyagasozi.
Tubibutse inkomoko y’urupfu rw’uwo mutegarugori yari amahane no kutumvikana kwaranzwe mu rugo rwabo aho umugabo bivugwa ko yasahuraga umutungo w’urugo awujyana mu nshoreke.

Besabesa Etienne / Izuba Radio

Subscribe to izubaradio.com RSS


Main menu 2

by Dr. Radut