Jump to Navigation

August 2011

admin's picture

Umubano uri hagati y'u Rwanda na Uganda nta makemwa!

Mu kiganiro n’abanyamakuru,Perezida wa Uganda Yoweri Kaguta Museveni yanyomoje ibyavugwaga ko hari umwuka mubi  hagati yigihugu cy' u Rwanda n’igihugu cya Uganda avuga ko Abanyarwanda n'Abagande ari abavandimwe: yagize ati "abaturage b’u Rwanda n’abaturage b'i Bugande turi abavandimwe nkuko mubizi kuko duturuka hamwe icyo ni icyambere, ikindi gihe hari genocide mu mwaka w’igihumbi 1959 Abanyarwanda ntibigeze bahungira mu bubirigi, ntibigeze bahungira muri paris, ahubwo bahungiye muri Uganda, i Burundi, Congo na Tanzania.Natwe igihe Idi Amini yatwicaga sinigeze mpungira mu Bwongereza ahumbwa nahungiye muri Tanzania, ibyo nibigaragaza ko turi bamwe. Ikindi cya  2 muri politike twakoranye hamwe aho igihe Idi Amini yicaga Tanzania yaradufashije, igihe umuryango FPR yabohoraga u Rwanda twarabafashije ".Prezida w’u Rwanda Paul Kagame akaba yashimangiye ko umubano wibi bihugu byombi uhagaze neza "Twebwe uruzinduko rwe rwari ingenzi kuko ruje gutsindagira umubano uri hagati yibi bihugu byombi ntabwo ari abakuru bibihugu gusa ariko nabaturage muri rusange.Ikindi ntibivuze ko hagati y'ibi bihugu byombi ibyiza ntibyabayeho kandi inama nkizi ntizibaho kubera ko hari ibibazo hagati y’ibihugu, ahubwo habaho inama hashimangirwa ibiba byakozwe ndetse hanashakishwa ubundi buryo bwo kwihutisha iterambere. Uruzinduko rwagenze neza kandi tugomba guhora twubakira kuri ibyo kugirango twubake ejo hazaza heza ".   Muri icyo kiganiro kandi hagarutsweho ikibazo cy’inzara ikomeje kwibasira  ihembe ry’Afurika cyane cyane igihugu cya Somalia, aba Perezida bombi bavuze ko nk’ibihugu bikennye, ubushobozi bwabo bugarukira ku gutanga umusanzu wo gucunga umutekano gusa. Mu gusoza ikiganiro n'Abanyamakuru Perezida wa Repubulika y’u Rwanda Paul Kagame yavuze ko gusurana bizahoraho, mu rwego rwo guteza imbere ubuhinzi n’ubworozi ndeste n'ikoranabuhanga hagamijwe kwongerera ubucuruzi n’ubuhahirane mu karere .Gacinya Regina / Radio Izuba i Kigali

admin's picture

Abakunzi b'amafi bo mu murenge wa Rukira kuri ubu bari mu gahinda

Ikiyaga cya Rurima giherereye mu birometero nka 18 uvuye mu mujyi wa Kibungo, gifite metero 400 kuri metero 100, gikikijwe n’imirima y’Inyanya n’Intoki. Ukigera kuri iki kiyaga kiri hagati y’Umudugudu wa Kabeza na Bugaragara ubona  amafi menshi ari hagati y’ikiro n’igice (11/5 kg) n’ibiro bibiri (2kg) areremba hejuru y’amazi kuburyo utarebye neza wagira ngo arota izuba, nyamara yose arapfuye.Bamwe mu baturage Radio Izuba yahasanze bahinga mu mirima ikikije icyo kiyaga bayitangarije ko batazi impamvu yaba yarateye ayo mafi gupfa, gusa ngo bakeka ko byaba byaratewe n’umuti w’abahinzi b’inyanya zikikije icyo kiyaga. Gasana Anastase ni umwe mu baganiriye na Radio Izuba yagize ati: “Iki gishanga hari abantu bagihingagaho imboga bagatera imiti ya Tioda, bagatera imiti ijyanye no kwica udukoko turya inyanya kuko Pajerak yari yabazaniye amafi agera kubihumbi makumyabiri mu buryo bwo kubatera inkunga, ubwo rero ibabwira yuko bidashoboka ko bongera guhinga inyanya aho hafi kuko bizakenera kuzitera imiti kandi iyo miti izirana n’izo somake, ubwo rero abaturage ntabwo bigeze babyitabira”. Umuyobozi wa cooperative Imbaturabukungu Rugina Emmanuel yatangaje ko akimara kubimenya yahise abimenyesha  Ubuyobozi ndetse n’abaterankunga aho yagize ati: “kuwa 29 nibwo nasanze aya makuru ahari, ngerageza gukurikirana, koko nigereyeyo nsanga amafi ararushaho gupfa umunsi ku munsi, ubwo nagerageje guhita menyesha inzego z’ubuyobozi ndetse n’abaterankunga bari babidufashijemo Pajerak”.Kazadi Charles  Umuyobozi  w’Umurenge wa Rukira yabwiye Radio Izuba ko bagiye gufasha iyo cooperative bayikorera ubuvugizi aho yagize ati: “ Ibijyanye n’iki kibazo natwe tumaze kukimenya  icyo twihutira gukora  nk’ubuyobozi ni ukumenyekanisha iki kibazo mu nzego zibishinzwe kugira ngo kirusheho gusuzumwa no kwitabwaho neza”.Umuyobozi wa Police muri Rurama na Rukira AIP Eduard Ndamukunda yatangarije Radio Izuba  ko bataramenya  impamvu  nyakuri  yaba yarateye urupfu rw’aya mafi  ariko ko iperereza rigikomeza, akomeza anagira inama ubuyobozi ko batwara ayo mafi kuri Laboratoire ngo harebwe impamvu nyakuri yaba yarateye ayo mafi gupfa, dore ko  ayiganje ari amafi manini, ibi bikaba bibaye nyuma y’igihe gito bateyemo andi mafi mato mashya.Kugeza magingo aya  amafi amaze gupfa afite agaciro ka miliyoni eshanu y’amafaranga y’u Rwanda.BAYINGANABonfils / Radio Izuba i Ngoma

admin's picture

Ibikorwa by’uburobyi mu kiyaga cya Sake byarasubukuwe

 Aba barobyi batangaza ko uyu mwuga wabagejeje kuri byinshi kandi byatumye biteza imbere kuburyo bugaragara batangaje ko muri aya mezi ashize barabujijwe kuroba bakoraga akazi ko gucungira umutekano iki kiyaga bafata nk’isoko y’ubukire kuribo n’imiryango yabo. Uretse kuba abaroba bishimira ibyiza bakesha uburobyi abaturiye iki kiyaga nabo ngo ntibasigaye inyuma. Umuyobozi w’akarere ka ngoma bwana NIYOTWAGIRA Francois muri uyu muhango wo gufungurira amayira abarobyi mukiyaga cya sake yabibukije ko aribwo buzima bwabo kuko abenshi ariho bakura amaramuko, abasaba ko bakumira ikintu cyose cyahungabanya ubuzima bw’aya mafi n’icyahungabanya ibidukikije muri rusange. Abaturage kandi basabwe kuba ishisho rya bagenzi babo kandi bagatanga amakuru cyane kubantu baragira amatungo yabo bakangiza ibidukikije ndetse n’abahinga hafi y’ikiyaga. Pelagie MUKANEZA/ IZUBA Radio 

admin's picture

MUKAMUNGU Anonciatha yacakiwe ataragurisha umutwe w’umwuzukuruwe.

 Uwo mwana waje kurusimbuka ubu akaba ari kumwe n’abayeyi be mu kagali ka Nyakabungo, nyirakuru yari kumugurisha amafaranga agera muri miliyoni imwe n’igice .Uwari wahawe akazi ko kumuvutsa ubuzima aciwe umutwe niwe waje kuburira inzego zumutekano zihita zita muri yombi uwo mugore MUKAMUNGU Anonciatha.  MUKAMUNGU Anoncitha wo mu kagali ka Nyakabungo,umurenge wa Mpanga umugambi we watahuwe kuwa gatandatu,ubwo ngo uwo yari yabikije ibanga  yamutabaga mu nama,akarikocora akabwira abaturanyi uko ibintu bimeze nabo bakihutira kubimenyesha inzego zumutekano. Uko kugeza amakuru ku bo areba abaho i Nyakabungo barabishimirwa nubuyobozi bunatangaza ko ubuzima bwuwo mwana wumukobwa w’imyaka 12 ubu bumeze neza.   Titien MBANGUKIRA / Radio Izuba 

admin's picture

Abaturage bo mu karere ka Ngoma bagiye gusezera ikoreshwa ry’isuka mu guhinga.

 

Abaturage biganjemo abahinzi n’aborozi baganira na Radio IZUBA bashimiye amajyambere bagejejweho harimo imashini zihingishwa ku butaka burambuye , imisozi no ku materasi. Abaturage ngo aya majyambere basanga ko yaje bayakeneye kuko imvune bagiraga mu mihingire yabo igiye kugabanuka.

 

 

Mukamana shantal ati “Imana ishimwe pee!! , ubu tugiye kuzajya duhingira ku gihe , kandi duhinge ahantu hanini kandi umunsi umwe, duhingisha isuka twajyaga duhahingira icyumweru cya ibyumweru b’ibiri akenshi tukanasubiramo kuko haba haraye,ariko ubu byakemutse”.

 

 

Agnes KARIBATA ministri b’ubuhinzi n’ubworozi avuga ko izi mashini zirimo izirima, izi coca ndetse n’izitera imbuto uzatuma umusaruro w’inshuro ebyiri kandi mwiza. Aboneraho gushimira koperative KOABICA yo mu karere ka Ngoma ku gitekerezo bagize cyo kwigurira iyo mashini dore ko ariyo koperative yonyine mu karere yiyemeje guhinga bakoresheje imashini yakijyambere.

 

 

Ikindi yavuze nuko izi mashini zitazajya zikoreshwa mu buhinzi gusa ahubwo no mubworozi zizabafasha mu kuzorora kijyambere.

 

 

Kugirango umuturage abone iyi mashini yo guhinga, ashaka kuyigura cg se kuyi kodesha ,azajya ayisanga ku kigo cyigihugu gishinzwe guteza imbere ikoreshwa ry’amashini mu mirimo itandukanye y’ubuhinzi ndetse n’ikorana buhanga mu kuhira imyaka ( task force on irrigation and mechanisim)

 

Imashini kugeza ubu ziri mu Rwanda ni mashini 250 intoya, inini 50 zikaza kwirakwizwa mu turere twose.

 

GACINYA M. Regina/ Radio Izuba

 

 

 

admin's picture

Abaturage batuye mu turere twa Ngoma na Kirehe bagiye kubona amazi meza.

 

 Ubwo   hafungurwagwa  kumugaragaro   uyu mushinga   wo  gukwirakwiza  amazi  meza mubyaro   byo  murutu turere twa Ngoma na Kirehe, kuri uyu   wa  3  tariki  ya 17.08.2011,bamwe  mubaturage  batuye  muri utu  turere  bishimiye  iki gikorwa, bavuga  ko  ubwo  bagiye  kubona  amazi  meza  ,bizagabanya  ingendo  bakoraga   bajya  kuvoma, Mukarugwiza  Bellancille  ni umwe mu baturage batuye  mu mudugudu  wa Rugenge ,mu Kagali  ka  Nyabikokora  mumurenge  wa kirehe   yatangarije Radio Izuba agira ati “kuba  tugiye kubona  amazi  meza  ubu  hehe n’indwara  zituruka  kumazi  mabi”, naho    Umutesi  Denise  n’umunyeshuli  wiga mumwaka  wa 6 w’amashuli  abanza  I Nyamugali  Mumurenge  wa kirehe   we  yagize  ati  “akenshi   njya  nkererwa    kujya  k’umasomo  bitewe  nuko  aho tuvoma  ari  kure,kugirango  mbone  amazi meza     nkora   urugendo  rw’ibilometelo  hafi 2  none  niba  koko  bagiye  kutuzanira  amazi hafi  bizamfasha  mu myigire  yanjye kuko ntazongera gukererwa”.

 

 
 

Ambasaderi  w’Ubuyapani   mu rwanda  Kunio  Hatanaka  mwizina  rya  Guverinoma  y’Ubuyapani   akaba  ari  nayo yateye  inkunga  yo  kubaka  iyi  miyoboroyo  binyuze  mu mushinga  wabo witwa  JICA,    yishimiye  iki gikorwa yashyizeho    umukono  ubwo  hari  kwitariki  ya  26/3/2010,kuba  kigiye   gutangira  gushyirwa  mubikorwa    avuga  ko  ayo  mafaranga  azafasha  mubikorwa  bitandukanye   hubakwa  ibigega  ndetse  n’ imiyoboro  y’amazi   akaba  yakomeje  agira  ati” kugeza  amazi  meza  ku baturage  ni ngombya  k’ubuzima  no  mubikorwa  byamajyambere”.

 

Umunyamabanga  wa  leta  muri  Minisiteri  yibikorwa  remezo   Coletha  Ruhamya  w’ari umushyitsi mukuru  muri uwo  muhango  yavuze  ko  no  muyindi  mirenge  itarageramo   amazi,  Leta ifatanije  nubuyobozi   bw’inzego  zibanze  bazakora  ibishoka  byose  kugirango  naho  amazi  meza  ahagere,kandi  Leta  ikazakomeza  gufatanya  n’Ubuyozi    mukubaka  ibikorwa  remezo.

 

Twababwira  ko  mukarere  ka Kirehe  aya mazi  azagera  kubaturage  bo  mu mirenge  itanu  bagera  kubihumbi mirongo itatu na kimwe, naho  mu Karere  ka  Ngoma  aya mazi  azagera  kubaturage  bo  mumirenge ibiri  bagera  kubihumbi  makumyabiri n’umunani, aho   buri muturage  azajya  avoma  atarenze  muri  metelo  maganatanu (500m),ibyo  bikorwa  byose  bikazarangirana  n’umwaka  wa 2012.

 

 

 

BESABESA Mivumbi  Etienne  / Radio Izuba

 

admin's picture

Aba Mahango mu karere ka Ngoma, ubuyobozi ngo bujye bubasobanurira

Urutoki rwatemwe

 

Ubwo twageraga muri aka kagari ka Mahango mu mudugudu wa Rebezo twahasanze abakora igihano simburagifungo ( abatigiste) bari mu gikorwa cyo kurandura imyaka, ahavugwa ko hazashyirwa ibikorwa remezo rusange. Bamwe mu baturage twahasanze nabo bari mugikorwa cyo kwegeranya imwe mu myaka yarimaze gukomera kugirango ibe yabatunga.

 

Twabegereye turaganira badutangariza y’uko iki gikorwa cyabituye hejuru, batabanje guteguzwa n’ubuyobozi.

 

Kanyindi Milliam n’umuturage utuye mu mudugudu wa Rebezo mu kagari ka  Mahango we ati “ birababaje cyane kubona abayobozi baza bakaturandurira imyaka batatumenyesheje, erega ntabwo twanze iterambere ikibazo nuko batatubwira”

 

Kanyina laurencia we ati “ gusa batubwiye ko hagiye kuza umushinga ntibatubwira icyo uyo mushinga ugiye gukora, ikindi kubona baza gutema intoki zacyu arizo zidutunze, zishyurira abana amashuri, ubuse tuzabaho gute, ese bazadushumbusha?”

 

Kuruhande rw’ubuyobozi bwa karere ka Ngoma bwo  buvuga ko abaturage babimenyeshejwe mbere y’uko iki gikorwa cyo kurandura imyaka gishyirwa mubikorwa.

 

Umunyamabanga nshingwabikorwa wa kagari ka Mahango UWITEGETSE Laurence aremeza ko bamenyesheje abaturage mu nama ebyiri bagiranye nabo kandi muri izo nama  ntibigeze bagaragaza ko ayo majyambere ibabangamiye.

 

Igiteye urujijo abo baturage bo mu kagari ka Mahango ngo nuko batazi niba bazanahabwa indishyi y’ibyangijwe.Twashatse kumenya icyo ubuyobozi bwa karere ka ngoma kabivugaho maze twegera Micheal Sanzuwera,ushinzwe ubutaka n’imiturire mu karere ka Ngoma.

 

Ibikorwa biteganyijwe kuzubakwa muri ako kagari harimo imihanda , amazi meza, ndetse n’amashanyarazi dore ko akarere ka Ngoma kavuga ko umujyi wa Kibungo ariho uzagucyira.

 

GACINYA Regina/ IZUBA Radio

 

admin's picture

Ngoma : Inka 41 mu bwishingizi bwa SONARWA

 

Aborozi bo mu karere ka Ngoma  barakangurirwa kwitabira gahunda yo gushyira amatungo yabo mu bwishingizi kuko iyo agize icyo aba bashumbushwa.Gahunda yo gushumbusha abagize ingorane zo gupfusha inka mu minsi ishize bo mu karere ka NGOMA kuri uyu wa kane yatangiye ubwo Isosiyeti yubwishingizi mu Rwanda SONARWA yashyikirizaga miliyoni 2 n’ibihumbi 400 ku borozi 2 bo muri koperative y’aborozi b’inka za kijyambere mu karere ka NGOMA.Ubwo bwishingizi ngo buzanatuma aborozi babufatiye amatungo yabo bagana amabanki nta kwitinya.

 

Abashumbushwe ni Aborozi 2, aribo NTUYENABO Julien w’i Nyaruvumu mu murenge wa Rukira na TAHIMANA Jean Baptiste wo mu kagali ka Mahango muri Kibungo buri wese yashyikirijwe cheque ya miliyoni 1 n’ibihumbi 200.Basanzwe ari aborozi ba kijyambere bakaba bacyumva ibyubwishingizi butangwa na SONARWA bw’amatungo batarazuyaje kubwitabira kuri bo bakaba babonye inyiturano ubwo bashumbushwaga.Bahise biyemeza kuba abakangurambaga ku bandi borozi

 

Ubwo yabashyikirizaga izo cheque zo kubashumbusha , bwana  RWAKAZINA Olivier umuganga w’amatungo ushinzwe ishami ry’ubwishingizi bwayo muri SONARWA yavuze ko ari igikorwa batangiye bazakomeza,anagira inama aborozi gufata ubwo bwishingizi kuko bituma borora batuje.Yanavuze ko iyo bashumbushije umworozi bamuha inka koko ifite umukamo utubutse

 

Ubwo abo borozi bashumbushwaga,umuyobozi w’akarere ka Ngoma wungirije ushinzwe imibereho myiza yabaturage Madame KIRENGA Providance yaboneyeho gusaba aborozi ko bakorora bagamije kwiteza imbere. Uko kwiteza imbere bakaba babigeraho mu gihe borora inka zibaha umukamo kandi ntibatinye no kwaka inguzanyo nkuko Dr BUGINGO Gilbert ushinzwe ubworozi mu karere ka NGOMA abigarukaho

 

Koperative KIDAFACO ibumbye aborozi b’inka za kijyambere  muri Ngoma  ngo izakomeza gufatanya na SONARWA ifite intego yo kuba akarusho muri byose .Inka 41 nizo ubu SONARWA yamaze guha ubwishingizi muri Ngoma, akarere kabarurwamo inka zigera mu bihumbi 30.

 

Titien MBANGUKIRA/Radio IZUBA

 



Main menu 2

by Dr. Radut