Jump to Navigation

July 2012

admin's picture

Gukuramo inda ubu byamaze kwemerwa mu Rwanda

Nyuma y’impaka ndende zimaze iminsi ku bijyanye n’itegeko rigenga gukuramo inda aho abantu batumva kimwe ingingo ya 165 y’iri tegeko rigaragara mu itegeko ngenga rishyiraho igitabo cy’amategeko ahana  cyasohotse  mu igazeti ya Leta idasanzwe yo kuwa 14/06/2012, aho impaka kuri iri tegeko zageze ku mkusozo.Muri iyo gazeti yaleta irimo amategeko menshi yagiye avugururwa ariko iryari ryitezwe ni irerekeye gukuramo inda ku mpamvu zimwe na zimwe.

Nko mu ngingo y’162 bavuga ko Umuntu wese wakuyemo inda ahanishwa igifungo kuva ku mwaka umwe (1) kugeza ku myaka itatu (3) n’ihazabu y’amafaranga yu Rwanda kuva ku bihumbi mirongo itanu (50.000) kugeza ku bihumbi magana abiri (200.000).Ingingo ya 163 yo ivuga ko Umuntu wese ukuramo umugore inda ariko nyir’ubwite atabyemeye, ahanishwa igifungo kuva ku myaka icumi (10) kugeza ku myaka cumi n’itanu (15). Mu gihe babyemeranyijweho, ukuyemo umugore inda ahanishwa igifungo kuva ku myaka ibiri (2) kugeza ku myaka itanu (5). Ingingo yari yateje impaka ndendende, n’ iy’165 ivuga  Ukutaryozwa icyaha cyo gukuramo inda aho bavuga ko, Nta buryozwacyaha ku mugore no ku muganga wakuyemo inda bitewe  no kuba umugore yatwaye inda atayishaka kubera gukoreshwa imibonano mpuzabitsina ku ngufu;  kuba yarashyingiwe ku ngufu; kuba yatewe inda n’uwo bafitanye isano ya hafi kugera ku gisanira cya kabiri; cyangwa se kuba inda itwiswe ibangamiye cyane ubuzima bw’umwana cyangwa ubw‟umubyeyi.

Gusa nubwo bimeze gutya haracyari ibikibura  ifujwe muri iri tegeko cyerekeranye no guhana abagabo batera abakobwa cyangwa abagore inda bakabihakana dore ko kenshi abagore bahitamo gukuramo inda ari gake gashoboka bavuga ababa barabateye inda cyangwa se banabavuga ugasanga ntibakurikiranwe n’amategeko.Iri tegeko ryemejwe mu gihe abantamadini n’abihaye Imana batahwemye kugaragazako iri tegeko ribangamiye uburenganzira bwa muntu,  ndetse bakaba barasabaga ko ritatorwa.

 Muhirwa Oliver  /  Radio  izuba

 

 

 

 

admin's picture

Yaramubyaye ahitamo kumwica aho kumurera

agahinja

Abaturage bubaka muri iri soko nibo basanze igikarito munsi y'imiyenzi ihari rurimo umurambo w'uruhinja, uwabikoze yasize aruzingazingiye mu myenda arambika aho arigendera. Umwe mu bubatsi babitangarije Radio Izuba witwa Ntirenganya Geremie niwe wabaye uwa mbere mu kubona uyu murambo, yahise atabaza umunyamabanga nshingwabikorwa w'akagari ka Karama Aline Nizeyimana nawe ahageze ahita yiyambaza inzego zo hejuru, akomeza agira ati" igihe nayoboreye Karama  nta bikorwa nk'ibi byigeze biboneka". kugera ubu uwakoze ubu bugizi bwa nabi ntaramenyekana.

 

Aloys Gonzague Ntwali  /  Radio   Izuba

admin's picture

Imurikabikorwa nyarwanda muri 2012 i Gikondo Magerwa

expo

Iri murikabikorwa nyarwanda (Expo) riri kubera i Gikondo Magerwa,  rihuriyemo n'abacuruzi batandukanye bo mu Rwanda ndetse n'abandi baturutse mu bihugu bitandukanye byo ku isi, rikaba kandi ririmo ibikorwa bya Leta, iby'amadini, iby'amabanki yo mu Rwanda ndetse no mu mahanga, ryafunguwe ku mugaragaro ku munsi w'ejo kuwa 26/7/2012.

Iri murika bikorwa rikaba ryaratangiye kuwa 25/7 rikazagera kuya 08/08/2012.

Admin

admin's picture

AGAKINGIRIZO K’ABAGORE MU RWANDA NTIKITABIRWA.

agakingirizo

Iyi mibare igaragaza ko aka gakingizo k’abagore kuva mu 2009 abagakoreshaga bari ibihumbi mirongo itandatu n’icyenda (69 000), mu 2011 bakaba baraGABANUTSE BAGERA ku bihumbi mirongo itanu (50 000),  mu gihe akabagabo ko byiyongereye biva kuri miliyoni cumi n’eshanu n’ibihumbi ijana(15 100 000) mu 2009 bagera kuri miliyoni makumyabiri n’eshatu(23 000 000) mu mwaka w’2012. Jean Luc MUSONI ashinzwe ubushakashatsi muri RBC aratangaza ko  impamvu ituma udukingirizo tw’abagore tudakoreshwa cyane ahanini biterwa n’uko nk’abacuruzi bo badakunda kuturangura ikindi kandi abantu bakaba badufite ho imyumvire itariyo dore ko bavuga ko kagoye kugakoresha.

Muri ubu bushakashatsi hanagaragajwe kandi ko udukingirizo hari aho bageze basanga ari duke tudahagije cg ntatwo  ahandi ari twinshi twararengeje igihe, twaranatoye uruhumbu kubera ko tubitse nabi.Jean Luc MUSONI aratangaza ko, mu rwego rwo gukemura ibi bihaye gahunda yo koroshya uko agakingirizo kaba aka abagore cg akabagabo karushaho kugera ku muturage.  gutanga udukingirizo bikazajya bikorwa kimwe mu Rwanda hose dututurutse kurwego rwa RBC tukamanuka tukagera ku mafarumasi y’uturere nabo bakatugeza ku bigo nderabuzima , imiryango itegamiye kuri Leta , koperative,utubari cg ama association, bandikiye CDLS (komisiyo y’akarere yo kurwanya icyorezo cya SIDA) bakagaragaza utwo bakeneye kandi bagiye gutanga ubundi bakaduhabwa na pharmacie y’akarere ishingiye kubasabye tukabageraho bitarenze ukwezi kumwe, ibi bikaba  bitandukanye n’uko byakorwaga kuberako ubundi pharmacie z’uturere zaduhaga ibigo nderabuzima gusa bikadutanga hanifashishijwe abajyanama b’ubuzima. Abitabiriye inama baratangaza ko utu dukingirizo bagiye kwitabira gahunda yo kutugeza kubanyaRwanda kugirango tubafashe.Twababwira ko ubu bushakashatsi bwakozwe na RBC kw’ikwirakwizwa n’ikoreshwa ry’agakingirizo gafatwa nka bumwe mu buryo bukoreshwa mu kurwanya indwara zandurira ,mu mibonano mpuzabitsina zirimo icyorezo cya SIDA ndetse kakaba kanagakoreshwa mu kuboneza urubyaro, bwakorewe mu turere twa RUSIZI, RUBAVU,NGORORERO ,GATSIBO,GICUMBI NA GASABO.


Martin Mwiseneza  /  Radio  Izuba

 

admin's picture

Miss INATEK 2011 Uwingabire Odette yafashije umupfakazi wa genocide.

miss inatek

Uyu mupfakazi wahawe ibikoresho atuye  mu  mudugudu  w’Amahoro  mukagari    ka Karenge mu  murenge  wa  kibungo  ho  mu  karere  ka  Ngoma,  akaba  yamushikirije ibikoresho  bitandukanye  .

Akaba  yatanze  ibikoresho  bifite  agaciro  k’amafaranga ibihumbi  135  by’amafaranga y’ uRwanda  , ibi  bikoresho byiganjemo  matolas, indobo ,umuceri,isukari ,amavuta y’ubuto ndetse  n’ibindi  bikoresho  bitandukanye  akaba aribyo  byashikirijwe  umupafakazi  witwa  Mukandagwa  Annonciata. N’ibyishimo  byinshi  uyu  mubyeyi  yatangaje  ko  ibi  bikoresho  bizamufasha  mubuzima  bwe  busanzwe. Mukandagwa  akomeza  agira  ati  ’’  iki  gikorwa  kirandenze  bikaba  binangaruriye  ikizere  kubera  kwiheba  cyane  ntekereza  ko  ntamuntu Unyitayeho  cyangwa ukinyibuka ,  ariko  ubu  ntangiye  kujya  ngira  ikizere  nkunva  ko  ubuzima  bwanjye  bugomba  gukomeza . ’’

Akomeza  asaba  ubuyobozi  ko  bwa  mufasha  mubijyane  no  kwivuza Ibikomere  yatewe  na  genocide  yakorewe  abatutsi  mu  Rwanda muri mata 1994, kuko Buri  gihe  ibi  bikomere  bihora  bi  mugaruka.Miss  INATEK  2011  Odette  Uwingabire  akaba  yatangaje  ko  nk’urubyiruko  batekereje  gukora  igikorwa nkiki cyo   kumufasha bamuba  hafi  kugirango  ave  mu  bwigunge,  kandi  anagire  ikizere  cy’ubuzima  bw’ejo  hazaza  kuko  ubundi  nta  bandi  bana uyu mu byeyi  afite.Akaba  yagize  ati  ‘’  twebwe  nk’urubyiruko  rw’ u  Rwanda  tugomba  gufasha  abantu  nkaba  bahuye  n’ibibazo  ndetse  tukanabafasha  mu bikorwa  bitandukanye kugirango babone  ko  bagifite  abantu  ba batekerezaho. ’’

Twababwira  ko  uwingabire  Odette  nyampinga  wa  inatek  2011  ibi  bikorwa  yabikoze  mu  rwego  rwo  gushyira mubikorwa gahunda  zitandukanye  yari  yari  haye  zo gufasha  abantu  batandukanye  batishoboye.

 Besabesa Etienne / Radio  Izuba

 

 

 

 

admin's picture

M23 ivuga ko umupaka wa Bunagana ufunguye

RDC

Jean Marie Runiga,umuyobozi ushinzwe ibya politique mu mutwe wa M23 aratangaza ko izampuka ry’ibiciro mu bice binyuranye bya congo, bivugwa ko byaba byaratewe  n’ifungwa  ry’umupaka  wa bunagana uhuza  repubulika iharanira demokarasi ya congo  n’igihugu cya uganda ataribyo, kandi ko nta  kibazo na kimwe kiri muri ako gace k’ ubuzima n’urujya n’uruza rw’abaturage. ( bunagana kuri ubu ntabwo iyobowe na leta ya kinshasa , iri mu maboko ya m23 , niba ako gace ka bunagana katari mumaboko yabo, bishoboka gute gutegeka ko umupaka ufungwe ? ubu tuvugana abantu barimo gukoresha uyu mupaka , abacuruzi , abaturage bose barinzira bakanasohoka  nta kibazo. Twe dukunda abaturage bacu , dubashakira ibyiza , ariko icyo leta ya congo yifuza nuko abo baturage bahera mu buhungira .)

Ibi yabitangarije Radio izuba , mugihe  Guverineri w’Intara ya Kivu y’amajyaruguru Julien paluku yari yasabye abacuruzi kureka gukoresha umupaka wa Bunagana kugeza igihe hazatangirwa andi mabwiriza, akabasaba gukoresha umupaka w’Isasha uri i Rutshuru n’uwa Kasindi uri i Beni cyangwa se umupaka muni n’umuto  y’i Goma.

Ku kibazo cyuko  umutwe wa M23 ushinjwa gushyira abana bato mu gisirikare , Runiga Jean Marie arabihakana akaba anabeshyuza raporo iherutse gushyirwa ahagaragara n’umuryango w’abibumbye ubatunga agatoki .

(ibyo ni binyoma bisa kuko twe ntabwo dushobora gushyira abana bato mugisirikare kandi ntabwo tubahatira kuko tuzi neza amategeko , ukweli nuko igisirikare kigombere abantu bakuze , bafite imbaraga kandi iyo umuntu ashaka kwinjira mugisirikare arizana , ibyo gusa  n’ibirego bya leta ya congo kinshasa bagerageza kwihimbira kuko babuze ibyo kuturega.)Umutwe wa M23 ugenzura aka gace ka Bunagana kuva tariki ya 6 Nyakanga 2012, nyuma y’imirwano yazihuje n’ ingabo za Leta ya congo.

 

GACINYA Regina / Radio Izuba

 

 

 

 

 

 

 

admin's picture

Perezida Kagame Paul yafunguye ishuri rya Gisirikare i Nyakinama

Afungura ku mugaragaro iri shuri, Perezida w’urwanda Paul  Kagame yatangaje ko  iri shuri ritangiye ari igikorwa gishimishije, kuko amasomo nkaya yajyaga atangirwa mu mahanga noneho bagiye kujya bayabona batagombye kujya kwiga ahandi. Avuga ko iri shuri ari ikimenyetso cy’iterambere mu gisirikari  cy’urwanda kandi ko rizatanga ubumenyi bufite ireme, buzanafasha mu kongera ubumenyi mu gukemura ibibazo byo mu karere, no kubungabunga amahoro.

Mu ijambo rye Minisitiri w’Ingabo Gen James Kabarebe, yavuze ko ibi biri mu rwego rw’uko u Rwanda rushaka gukora igisirikari cy’umwuga cyane ko igisirikare cy’urwanda giharanira ubusugire bw’igihugu, bityo rikaba rizafasha ingabo mu bikorwa bitandukanye biteza imbere igihugu birimo no kubungabunga umutekano no mu bihugu biri mu Karere u Rwanda ruherereyemo. Mu mpera z’ukwezi kwa Gatanu, igihugu cy’u Bwongereza cyohereje ikipe yasuzumye kandi yemeza ireme  ry’uburezi n’amasomo azatangirwa muri iri Shuri. Iyo kipe yari igizwe na Lt Col Jeremy Sharpe wo mu ishuri rya gisirikari rya UK Defence Academy ; Dr. Andrew Stewert wo muri Kings College i Londres ;Abakomanda Chris Taylor na Aoron Clips.

Aba banyeshuri 45 baziga igihe kingana n’ibyemuweru 46 ni ukuvuga hafi umwaka, rizatanga amasomo ajyanye n’ubumenyi mu bya gisirikari n’andi masomo anyuranye arimo ubumenyi muri politiki (sciences politique).

 

Cynthia Ingabire Knimba  /  Radio  Izuba

 

 

 

 

 

 

 

 

 

 

 

 

 

 

admin's picture

Kirehe hatangiye amahugurwa ku ibarurarusange rya kane.

ibarura

Mu kiganiro, Umuyobozi w’Akarere ka Kirehe Bwana Murayire Protais  watangije ayo mahugurwa ku mugaragaro yagiranye n’abayitabiriye, yagize ati:”Ntushobora gukora igenamigambi rinoze udafite imibare nyayo,”yavuze ko ari igikorwa gifitiye akamaro kanini igihugu kuko kizafasha mu igenamigambi ry’igihugu, muri gahunda zitandukanye z’uburezi, ubuvuzi, n’izindi. Yababwiye ko ari igikorwa kidasanzwe kuko gikorwa nyuma y’imyaka 10, icy’uyu mwaka kikazatwara amafaranga arenga Miliyari 16 n’igice.Umuyobozi w’Akarere yabasabye kurangwa no gukorera hamwe bakirinda gutenguha igihugu cyabizeye ababwira ko ibizava mu ibarura bizafasha muri gahunda ya EDPRS2  na Vision 2020.

Umuhuzabikorwa w’ibarura ku rwego rw’Akarere Bwana Ntamahoro Bazile yavuze ko kuri site ya Rusumo High School hahuriye imirenge 8 igizwe n’abantu 608 bagomba guhugurwa indi mirenge 4 nayo ikaba yahuriye kuri site yayo.Yavuze ko umutungo u Rwanda rufite ari abaturage, bityo akaba ari ngombwa kumenya umubare wabo kugira ngo babashe guteganyirizwa. Yijeje abayobozi b’Akarere ko umurimo bafite bazawukora neza muri iki gihe k’ibyumweru bibiri.Uyu muhango wo gutangiza amahugurwa arebana n’ibarura rusange ry’abaturage n’imiturire rya kane rizaba ku wa 15 Kanama kugeza ku wa 30 kanama 2012 mu karere ka Kirehe wari witabiriwe n’abayobozi ku rwego rw’Akarere n’inzego zishinzwe umutekano.

Gacinya Regina  /  Radio   Izuba

 

 

 

 

 

admin's picture

Qorani iri mu kinyarwanda kuri Radio Izuba nyuma yo kuyiha Perezida wa Repuburika

Islam

Ku gicamunsi cyo kuri uyu wa kabiri idini ya Islam mu Karere ka Ngoma Intara y'Iburasirazuba yashyikirije Radio izuba Impano ya  Qorani iri mu rurimi rw'ikinyarwanda, hamwe n'ibindi bitabo bitandukanye byari biherekeje iyi Qorani, byose ni ibyo  gufasha abazabisoma kurushaho gusobanukirwa neza Islam.

Uhagarariye Islam mu karere ka Ngoma Hakizimana Abdoulkalim  mu ijambo rye yasobanuye ko iki gikorwa bagiteguye mu rwego rwo kwerekana umubano Radio Izuba ifitanye n'iyi dini ya Islam ikorera muri aka karere.

Umuyobozi wa Radio Izuba Bwana Eric Kayihura mu kwakira iyi Qorani yatangarije aba Islam ko ari ikimenyetso kitazibagirana kuko ngo hagiye gushyirwaho isomero (Bibliotheque) ya Radio Izuba kugira ngo ibi bitabo bitari bike hamwe n'ibindi byari bisanzwe bibashe gutanga ubutumwa bubikubiyemo ku bazabisoma bityo biborohere mu kumenya  byimazeyo idini ya Islam ndetse n'ubundi bumenyi butandukanye.

admin's picture

Amahugurwa y'ayobozi b'inzego z'ibanze n'abanyamakuru i Ngoma

Abayobozi n’abanyamakuru barasabwa kurushaho kuzuzanya no guhanahana amakuru muburyo bwose bugamije iterambere n’inyungu by’abaturage, kugirango ibyemezo bifatwa n’abayobozi bigirire akamaro abo bayobora kandi abaturage nabo babigizemo uruhare. Ibi n’ibyagarutsweho mumahugurwa y’umunsi umwe yahuje abanyamakuru n’abayobozi b’inzego z’ibanze yaberaga mukarere ka Ngoma kuri uyu wakane.

Aya mahugurwa yateguwe n’umuryango ugamije gukemura amakimbirane SFCG hagamijwe kurushaho kunoza imikorere n’imikoranire hagati y’ubuyobozi bw’inzego z’ibanze hamwe n’abanyamakuru. Bwana Ngarambe Syliveri ushinzwe imiyoborere myiza mukarere ka ngoma yavuzeko aya mahugurwa atazateza imbere imiyoborere myiza gusa ahubwo azunganira muri gahunda zitandukanye. Kuruhande rw’abayobozi b’umurenge bo ngo aya mahugurwa abahaye ikerekezo cyo kugaragaza ibyo bakorera abo bayobora binyuze mu itangazamakuru. Bwana kalisa Narcisse ushinzwe gukurikirana ibikorwa by’umuryango SFCG murwanda yavuze ko aya mahugurwa bayategura bagamije kumvisha abayobozi ko ibyemezo by’abayobozi bafata bigomba kugaragaramo n’uruhare rw’abaturage.

Aya mahugurwa akaba yaragiye atangwa hirya no hino mururere dutandukanye kandi ngo hakaba hari ikizere ko azatanga umusaruro ugaragara cyane ko yaba abanyamakuru cyangwa abayobozi bose bafite intego yo kuvugira abaturage kucyabateza imbere.

 

 Pelagie Mukaneza / Radio Izuba

 

admin's picture

Ihoteri y'inyenyeri eshatu igiye kubakwa i Ngoma

Ngoma District

Mu nama yahuje abayozi batandukanye ba  karere ka Ngoma , abafatanyabikorwa ba karere ka Ngoma  yari igamije kubagezaho imihigo 2012 -2013 yateguwe kugirango bungurane ibitekerezo  ndetse bagaragaze uruhare rwabo mu kwesa iyo mihigo.Umunyamabanga nshingwa bikorwa wa karere ka Ngoma Muzungu Gerard arimbere yabafatanyabikorwa batandukanye yabagejejeho ibikorwa bigera kuri 40 biri mu mihigo bazamurikira Nyakubahwa President wa Republika.

Nyuma yo kubamurikira ibyo bikorwa, bahawe urubuga ryo kungurana ibitekerezo, aha bagaragaje ko nubwo ibyinshi  byatekerejweho bizateza imbere akarere ariko hari nibindi byarushaho kuzamura imibereho yabaturage. Bushayija Francis ati" ikibazo cy'amazi nacyo cyakagombye gutekerezwaho kuko ari ikibazo cy'ingutu cyugarije abaturage" undi ati "ikibazo cy'inzibutso kigomba guhita gishyirwa muri gahunda y'imihigo".

Umuyobozi wa karere ka Ngoma Nambage Afrodise mu kugira icyo avuga kubitekerezo byabo yagaragaje ko byatekerejweho ariko hibazwe cyane ku bikorwa bifitiwe amafaranga. Mubyo ngo bazibandaho cyane harimo ihoteri y’inyenyeri 3 ndetse n'ahantu hazajya hahurirwamo n’abaturage batandukanye bafite ibikorwa bitandukanye ( Cyasemakamba Community Development Center). Iyi mihigo yamurikiwe abafatanyabikorwa kuri uyu wa gatatu, izamurikirwa kurwego rw’intara y’burasirazuba kuri uyu wa gatanu.             

           

 Gacinya  Regina  /   Radio  Izuba

admin's picture

Abanyeshuri 992 bo muri INATEK bahawe impamyabumenyi

Inatek

Ibirori byo gutanga impampabumenyi kuri aba banyeshuri barangije umwaka ushize wa 2011, birabera ku kicaro cy’iri shuri mu Murenge wa Kibungo Akarere ka Ngoma Intara y’Iburasirazuba. Byitezwe ko abanyeshuri barangije ndetse n’inshuti zabo baturutse imihanda yose bazitabira ibi birori, utaretse n’abayobozi batandukanye.

Abanyeshuri 885 biga mu ishami ry’uburezi harimo ab’igitsina gore bagera kuri 51,93% n’abagabo 48,o7%, nibo bazahabwa impamya bumenyi hakiyongeraho n’abandi bo mu ishami ry’amajyambere y’icyaro bagera kuri 67 bagizwe n’abagabo 64,2% n’abagore 35,8%.Ishuri Rikuru ry’Ubuhinzi Ikoranabuhanga n’Uburezi rwa Kibungo (INATEK), riherereye mu Karere ka Ngoma mu Ntara y’Iburasuba, ryatangiye imirimo yaryo ku itariki ya 15 Gashyantare 2003 ritangirana abanyeshuri 355, ndetse iri shuri ryaje kwemerwa n’Iteka rya Minisitiri ku itariki ya 16 Kamena 2010, kuri ubu rifite abanyeshuri 3,718 biga mu byiciro bitandukanye.

 

admin's picture

Abayobozi barasabwa gukoresha umutungo bafite mu guteza imbere abaturage - " Perezida Kagame"

Paul

Ibi yabibasabiye mu nama yamuhuje n’abayobozi batandukanye bintara y’iburasirazuba, muruzinduko yagiriye mu karere ka nyagatare kuri uyu wa gatanu , aho yanasuye ibikorwa bitandukanye birimo uruganda ruconga amakaro, ndetse anashyira ibuye fatizo ahazubakwa ihoteli y’inyenyeri 4.

Ubwo bakiranga President Paul Kagame, inama ahanini yari igamije kungurana ibitekerezo bitandukanye kubijyanye  nuburyo hakomeza gutezwa imbere  ako  karere ndetse byumwihariko intara y’iburasirazuba.

Umuyobozi wa karere ka nyagatare ATUHE SABITI Fred, mu kugaragariza abo bashyitsi  ibyo ako karere kamaze kugeraho nyuma y’imyaka 3 , ngo ubu akarere kihagije haba ku biribwa ,  mu masoko ndetse no mubindi bikorwa byingiriza aka karere amadovise. Avuga ko iyi mishinga irimo hoteli , uruganda rwamakaro ndetse nikirimburi cyizahingwamo umuceri bizagirira akamaro abaturage muri rusange mu buryo butandukanye.President Paul Kagame mu ijambo rye yavuze ko  akarere ka Nyagatare gafite amahirwe menshi cyane mu kuzamura ubukungu , imibereho myiza y'abaturage kuko  gafite byinshi kandi bwiza, ati ayo niyo mahirwe ahandi badafite , bityo ngo ayamahirwe nazabacike ikindi President Kagame yasabye abo bayobozi , nuko bagomba buri gihe gushakisha imirimo cyangwa imishinga ifitiye inyungu abo bayobora.

Mu bibazo byagaragajwe aka karere ka Nyagatare  gafite harimo kuba ntamazi ahagije gafite , kuba akarere gatuwemo n’abaturage benshi kakaba gafite ibitaro bimwe ndetse kuba nta stadium gafite. Ibi byose President Paul Kagame yabijeje ko mugihe cya vuba bizashyirwa muri gahunda bikorwe.

Gacinya Regina  /  Radio  Izuba

 

 

 

admin's picture

Uruganda rw'amakaro i Nyagatare barutashye ku mugaragaro

kagame

Perezida Kagame yavuze ko amakaro akorerwa mu Rwanda ari inyungu ku Banyarwanda, ku majyambere y’Igihugu no mu Karere,yagize ati : "Abakora hano bakwiye kumenyera no gukora nijoro bakajya ibihe, bagasimburana uruganda rugakora amasaha 24 kuri 24. Isoko ryabaye rinini, ibintu bigomba guhinduka, imikorere n’imyumvire nabyo bigahinduka".

Yasabye ba nyiri uruganda guhaza isoko ryo mu Rwanda bityo bikagabanya umubare w’abajya kugura amakaro hanze. Yabasabye ko bagurisha ku giciro cyiza bakunguka aringaniye ariko bakongera umubare w’abaguzi.Birungi John Bosco, Umuyobozi w’itsinda ry’abashoramari “Crystal Ventures Limited”, yavuze ko uruganda rwatangiye kubakwa mu mwaka wa 2007 rushinzwe na “Rwanda Social Security Board” na “Crystal Ventures Ltd”.

Kuri ubu uru ruganda rufite abakozi 130 bahoraho ruteganya kongeramo 1, 000 badahoraho ; rufite imashini 20 rukoresha, rufite kandi urutare rucukurwaho amabuyuye avamo amakaro rungana na hegitare 53.Uruganda rwose rufite ubuso bwa hegitari 72. Ku rwubaka byatwaye miliyoni 15 z’amadolari y’Amerika.Ramba Afrique uhagarariye Inama y’Ubuyobozi y’Uruganda yavuze ko bazajya bagurisha meterokare 70.000 ku mwaka. Yavuze ko metero kare imwe izajya igura amadolari 60.Amakaro ya granite akorerwa muri uru ruganda afite akarusho ko kugira amabara menshi ugereranije n'asanzwe amenyerewe.Uru ruganda ruteganya kuzacuruza amakaro mu bihugu byo mu Karere, kuko ibyinshi byayaranguraga mu Bushimwa, aho byanatwaraga igihe kugirango abagereho.

GACINYA Regina  /  Radio  Izuba

 

 

 

admin's picture

Isabukuru y'imyaka 8 ya Radio imaze ishinzwe

Radio Izuba yashinzwe n’Ishyirahamwe ADECCO (Association pour le Development Communautaire), riharanira guteza imbere abaturage rikoresheje itumanaho, mu kwizihiza iyi sabukuru y’imyaka umunani imaze ibayeho, iranashyira ahagaragara uburyo bushya bw’ikoranabuhanga mu ihanahana makuru.

Nk’uko Umuyobozi wa Radiyo Izuba Kayihura Erick abisomanura  ubu buryo bwo kugeza amakuru ku baturage, buzajya bukoreshwa abaturage bifashishije telefoni zabo zigendanwa, aho umuntu azajya abasha kumva amakuru cyangwa gukurikirana ibiganiro akoresheje telefoni, kandi bitagombye ko iba irimo radiyo.

Ubu buryo Radio Izuba yise “Jyana umucyo’’ ariko mu ndimo z’amahanga bukaba bumenyerewe ku izina rya “Freedom fone”, ni ubwambere bugiye gukoreshwa na Radiyo zo mu Rwanda, Radio Izuba akaba ariyo ya mbere igiye kubukoresha, dore uko ubundi bwari bumenyerewe mu masosiyeti y’itumanaho mu Rwanda, aho umuntu ahamagara akabwirwa aho akanda kuri telefoni ye maze akagera kucyo ashaka.

Bwana Eric Kayihura yagize ati : ”Abazajya babasha gukoresha ubu buryo ni abantu bose batunze telefoni zigendanwa, hari ubundi buryo nabwo tugiye gushyira ho bwo koherereza ubutumwa bugufi ku bantu babishaka barimo ’Imboni’ za Radiyo Izuba (Aba ni abaturage batanga amakuru kuri Radio), ndetse kandi buzanakoreshwa n’undi muntu wese zaba ubyifuza”.Uretse ubu buryo kandi Radio Izuba iranishimira kuba yarabashije kugera ku ntego yayo, mu rwego rw’imiyoborere aho yabashije kuba umuyoboro mu hagati y’abayobozi n’abayoborwa, kuko ibiganiro by’abayobozi mu Ntara y’Iburasirazuba ibyinshi bitambuka inyumva-nkumve kuri Radio, abaturage nabo bakabigiramo uruhare.

Radio Izuba kandi yabashije gufungura akanyamakuru k’abana kitwa ‘Itetero’. Mu rwego rwo kujyana n’ikoranahuganga ubu Radio Izuba yabonye insakazamajwi igezweho (Digital), ituma kuri ubu ibasha kugera mu bice byinshi by’u Rwanda no mu bihugu bihana imbibi, doreko ari naryo koranabuhanga risabwakuri ubu mu isakazamajwi rya Radio mu Rwanda. Radio Izuba ni Radio y’Abaturage ikorera mu Ntara y’Iburasirazuba mu Karere ka Ngoma. Yashinzwe n’ishyirahamwe ADECCO (Association pour le Devéloppement Communautaire) mu 2004, yumvikanira kuri FM ku murongo wa 100 MHZ ; hose mu Ntara y’Iburasirazuba, mu duce tumwe na tumwe two mu Mujyi wa Kigali, mu Ntara y’Amajyepfo, mu duce tumwe na tumwe two mu Ntara y’Amajyaruguru , i Ngara na Karagwe muri Tanzania , ndetse no mu bice bimwe na bimwe bya Uganda.

Oliver Muhirwa  /  Radio  Izuba

admin's picture

Amazi yabaye ikibazo kinini kuva mu 2002 kugera ubu i Mutenderi mu Karere ka Ngoma

mutenderi

Kuruhande  rw’ubuyobozi  bwo  butangaza  ko  kubufatanye  n’umushinga  wa bayapani  JICA   batangiye  ibikorwa  byo  gucukura  aho  amazi  azanyura  ndetse  no  kuvugurura  uruganda  rwari  rusanzwe rugeza  amazi  mubaturage rwari  rwa rangiritse.Kuva  mu  mwaka  wa 2002 abaturage  batuye  mu  murenge  wa Mutenderi  ho  mu karere  ka  Ngoma batangaza  ko  bataragezwaho  amazi  meza  nkuko  bari  babisezeranyijwe  nubuyobozi  bw'aka karere.Ubusanzwe   ngo  mungo  zabo bakoresha  amazi atemba  ndeste n’ayibinamba  bakaba  bavuga  ko  bafite  impungenge z’indwara  bafite  kuzaterwa  nayo  mazi  Atari  meza  bakoresha  mungo  zabo.

Ubuyobozi  bw’umurenge  wa  mutenderi  bwatangarije Radio Izuba  ko nabwo  buzi  neza ko  muri  uyu  murenge  hari  ikibazo  cyamazi gikomereye  cyane  abatuye  muri  uyu  murenge  ,  umunyamabanga nshingwabikorwa  w'uyu  murenge  Bwana Murisa  Japhet  atangaza  ko  kubufanye  n'umushinga  wabayapani JICA  urimo gucukura  imiyoboro aho  bazanyuza  amatiyo  yamazi, gutunganya  imihanda n'amasoko  yaho  amazi  azava, hakazakurikiraho  kubaka  ibigega  byamazi  no  gushiramo  amatiyo.Akomeza  avuga ko  hari  ikizere  ko  abaturage  ba  mutenderi  vuba  aha  ikibazo  cyamazi  kigiye  gukemuka.

Akomeza  avuga  ko Kugeza  ubu  kuba  harabonetse amasoko  abiri  harimo  Kagoma, na  Musenyi  ibi  ngo  bizafasha  abaturage  kubona  amazi  kubwinshi,  naho  ibijyanye  no gusana imashini  izamura  amazi  ya  Kagoma  yari  yarangiritse  byose  ngo  biri  mubikorwa  bigomba  gukorwa  muri  uyu  mwaka.


Besabesa Etienne  /  Radio   Izuba


 

 



Main menu 2

by Dr. Radut