Jump to Navigation

November 2012

admin's picture

Komite nshya ya ADECCO yasuye Radio Izuba

logo

Ni ku gicamunsi cyo kuri uyu wa kane tariki ya 1Ugushyingo 2012 ubwo Komite nshya y'umuryango ADECCO ari nawo washinze Radio Izuba iyobowe na Bwana Munyandinda Emmanuel basuye Radio Izuba, ni mu rwego rwo kugira ngo bamenye abakozi b'iyi Radio nka Komite nshya yatowe kuwa 16/10/2012 no kugira ngo abakozi nabo babamenye. Bakaba bemereye abakozi ba Radio Izuba ko bagiye gutegura umwanya uhagije bakaza bakaganira nabo birambuye mu kurebera hamwe icyatuma iyi Radio ikomeza gutera imbere dore ko ubu umaze gukataza mu iterambere kandi  iri muri amwe mu maradio yigenga mu Rwanda  ikaba ari Radio y'abaturage mu baturage rwagati ivugira mu Ntara y'Iburasirazuba ku murongo w'100 ndetse ikanumvikana ku isi hose ku murongo nkoranyambaga wa Internet.

admin's picture

Ku ncuro ya gatatu Easten province talent award show igiye kongera kuba!

logo

Intara y’ Iburasirazuba kubufatanye na Radio Izuba n’abafatanyabikorwa batandukanye bateguye irushanwa ngaruka mwaka ryitwa Easten Province Talent Award Show rigamije kuzamura abahanzi bakizamuka ariko bagaragaza impano kurusha abandi akaba ari muri urwo rwego kwi tariki ya 02 ukuboza 2012 mu nzu mbera byombi y'akarere ka Ngoma guhera saa 13h00 z'amanywa.

Hateganijwe igitaramo kizabanzirizwa n'amarushanwa y'abahanzi bo mu ntara y'Iburasirazuba aho bazarushanwa mu ndirimbo,nyuma abazatsinda batanu ba mbere bakazakorerwa indirimbo na Studio kabuhariwe mu gutunganya umuziki mu Rwanda yitwa unlimited Records ndetse uwambere kubufatanye n'uruganda rwa Sulfo Rwanda industry akazanahabwa ibikoresho byisuku mugihe kingana numwaka .


Nyuma y'aya marushanwa hazakurikiraho igitaramo mbaturamugabo kizaba kitabirize n'abahanzi batandukanye bo mu ntara y'iburasirazuba ndetse n'ibihangange muri muzika nka Kamich, Jay polly, ndetse na Mihigo chouchou
Iki gitaramo abahanzi bose bazacyitabira bakazaririmba kuburyo bwa full live music.
Umuhuzabikorwa w'iki gikorwa Regina Gacinya atangaza ko iki gitaramo kidasanzwe kuko hari ibintu byinshi byakosowe avuga ko abahanzi bose bazatsinda muri iri rushanwa hazakomeza kubaho kubakurikirana kugirango bamenye nimba studio igomba kubakorera indirimbo nimba barubahirije amasezerano bagiranye.


Iki gitaramo kizabanzirizwa n'umupira w'amaguru uvuza ubuhuha uzahuza amakipe yimboni za Radio Izuba ageze ku mukino wa nyuma w'amarushanwa y'umupira w'amaguru yateguwe na Radio Izuba mu rwego rwo gushimangira ubumwe n'ubwiyunge mubakunzi ba Radio Izuba, amakipe azahurira ku mukino wa nyuma n'ikipe yitwa Inshuti za Radio Izuba FC & Koranamurava FC.

Besabesa Etienne  /  Izuba Radio

admin's picture

Murama barasabwa gufumbira Kawa aho kuyigurisha ifumbire

ngoma

Ibi akaba ari ibyashimangiwe  n’umunyamabanga nshingwabikorwa  wu  murenge  wa  Murama  Bushayija  Francis ubwo  kuri  uyu  wa 4 batangizaga  ku  rwego  rw’akarere igikorwa  cyo  gukoresha  ifumbire  mvaruganda mubahinzi ba  kawa ,  iki  gikorwa  kikaba  cyatangiriye  mu  kagari  ka Sakara  na  Mvumba  ho  mu  murenge wa Murama .

Muri  iki  gikorwa  cyatangiye  mu karere  ka Ngoma  cyo  gukoresha  ifumbire  mvaruganda   mu bahinzi  ba  kawa  akaba ari  mu  rwego  rwo  kongera  umusaruro  ndetse  no  kurushaho  kugira  kawa  nziza,  byatangiriye  mu murenge  wa  Murama  aho  abahinzi  ba kawa bari  bitabiriye  kubwinshi  baje kwigishwa  uburyo  bakoresha  iyi  fumbire  ndetse  bahita  bajya  no kuyikoresha  mu mirima  yabo  kugirango  bazabone  umusaruro  mwiza,  ubwo  Radio  Izuba  yageraga  aho  aba  baturage barimo  gufumbira  iki  gihingwa  cya  kawa yaganiriye n’uhagarariye  Cooperative IYAKABI y’abahinzi  ba  kawa bo  muri  uyu  murenge  ndetse n’umwe  mu bahinzi  ntangarugero  batangaza  ko  ubuhinzi  bwa  kawa  bwabagejeje  kuri  byinshi  .

Hakizimana  Protais  ukorera  ikigo  cy’igihugu  gishinzwe  kohereza  ibikomoka  k’ubuhinzi  n’ubworozi  aricyo  NAEB  akaba  anashinzwe  iterambere  rya  kawa  mu ntara  y’Iburasirazuba wari  waje  muri  uyu  murenge  wa  Murama yasabye  aba bahinzi  kwita  kuri  kawa  bazikorera  neza  kugirango  bazabone  umusaruro  uhagije.

Umunyamabanga  nshingwabikorwa  w’umurenge  wa  Murama  Bushayija  Francis  yagarutse  ku baturage  bahabwa  ifumbire  aho  kugirango  bayikoreshe  mubuhinzi  bagahitamo  kuyigurisha  mu bihugu byi  bitiranyi avuga  ko uzafatwa  azahanwa  n’amategeko.Ushinze  Ubuhinzi  mu karere  ka  Ngoma  akaba  yasabye abahinzi  bose  ba  kawa bo mu karere  ka  Ngoma gukoresha  vuba  iyi  fumbire muri iki  gihe  imvura  irimo  kugwa  kugirango  byibuza  tariki  ya 20 Ukuboza  bazabe  bamaze  gufumbira  kawa  yabo.

 Besabesa Etienne  /  Izuba Radio

admin's picture

Isabukuru y'imyaka 25 ya FPR Inkotanyi imaze ishinzwe muri Ngoma

ngoma

Abanyamuryango  ba   FPR  inkotanyi  bo mu kagari  ka  Cyasemakamba  mu murenge  wa  Kibungo  ho  mu karere  ka Ngoma    barasabwa  kurushaho  gukora  mu  rwego  rwo  guteza  imbere  igihugu  ndetse  n'abaturarwanda   bose  muri  rusange , ibi  babisabwe  na  Mme   Mukankuranga  Beatrice  Vice  Chair Man  w'umuryango  wa  FPR  inkotanyi  mu murenge  wa  Kibungo  ubwo  kuri  iki  cyumweru  yari  yifatanije  n'abaturage  bo  mukagari  ka  Cyasemakamba  mu kwizihiza  isabukuru  yimyaka  25  uyu  muryango   FPR inkotanyi   umaze  ushinzwe.

Abanyamuryango  ba FPR  inkotanyi  bo  mukagari  ka Cyasemakaba ho  mu murenge  wa  Kibungo  ubwo  kuri iki  cyumweru  bari  mu birori  byo  kwizihiza  isabukuru  y'imyaka  25  umuryango FPR  inkotanyi  umaze  ushinzwe bamwe  mubanyamuryago  ba FPR  inkotanyi baganiriye  na Radio Izuba  baratangaza  ko  hari  byinshi  bishimira  umurynago  FPR  Inkotanyi  wabagejejeho  ugereranije  n'uko  bari  babayeho  mbere.

Ruzindana  Augustin  Chair Man  w'umuryango  FPR  inkotanyi  mu kagari  ka  Cyasemamba  avuga  ko  imyaka  25  ishize  umuryango  ushinzwe  hari byinshi  byagezweho  kandi  bifitiye  akamaro  abaturage  bose. Umunyamabanga  nshingwabikorwa  wakagari  ka  Cyasemakamba  Lucien  Kamanzi atangaza  kugirango  ibyagezweho  mu  myaka  25  ishize  barushaho  gukora  kugirango  ibyagezweho  byiyongere  nta  kwirara.

Beatrice  Mukankuranga  Vice Chair  man  w'umuryango FPR  inkotanyi  mu murenge  wa  Kibungo  nawwari  witabiriye  ibi  birori  byo  kwizihiza  isabuku  y'imyaka  25  umuryango  FPR  umaze  ushinzwe  yaboneyeho  gusaba  abanyamuryango  gushyira  imbaraga  bitabira  ibindi  birori  byo kwizihiza  isabuku  yimyaka  25  FPR  inkotanyi  imaze  ishinzwe  ku  rwego  rw'akarere  ka  Ngoma  ukaza  tariki  ya  02/12/012  kuri  stade  ya  Cyasemakamba.

Besabesa Etienne / Radio Izuba.

 

 

 

 

admin's picture

Radio Izuba mu Ikoranabuhanga rishya muri Makerere University

Mu mujyi wa Kampala ho mu gihugu cya Uganda mukigo cya Makerere university muri Department ya Agricultural Innovation Systems Brokerage Association hatangijwe amasomo ajyanye no gukoresha ikoranabuhanga rishya ryo kohereza za SMS ku matelephone ngendanwa (Mobile phone)

Aya masomo ateraniyemo abahagarariye amashami y’ikoranabuhanga ku bigo bakoraho byo mu bihugu bitandukanye byo muri Afrika ndetse n’ahandi ku isi.  Iri koranabuhanga rishya rigiye gufasha ama Radio cyane cyane ay’abaturage yigenga (Community Radio)  mu gutanga amakuru hakoreshejwe ubu buryo aho uzaba yaramaze kwiyandikisha azajya abona ubutumwa bugufi bukubiyemo amakuru aba yatambutse ku nyakiramajwi zabo cg ubutumwa bugufi bumumenyesha ko hari icyo Radio yahisemo kumva hari icyo imuteganirije. Si ibyo gusa kandi iri koranabuhanga rishya rizaba rifite ubushobozi bwo kwakira ubutumwa bugufi buturutse kubakurikiye Radio nyuma yo kumva ibiganiro cg amakuru kubizaba bimaze gutambuka ku nyakiramajwi zabo. Twabibutsa ko Radio Izuba yo mu Rwanda  ariyo yabashije kwitabira aya masomo. Hakaba hateganijwe ko azamara iminsi itanu.

Vedaste ufitabe / Izuba Radio  Kampala - Uganda

 

admin's picture

ADECCO yagiranye ubusabane n'ababakozi ba Radio izuba

adecco

Mu biganiro byabereye ku kicaro cya RADIO IZUBA,nkuko byagaragajwe na President w’ADECCO Bwana MUNYANDINDA Emmanuel, mu izina ry’abo bafatanije kuyobora yashimye ibyagenzweho muri Radio Izuba mu gihe cy’imyaka igera mu munani imaze itangiye,uko  yafashije abakozi bayo kwiteza imbere muburyo butandukanye, haba mubukungu, imibereho no kwagura ubumenyi kubera amahugurwa atandukanye bagiye bahabwa hirya no hino mugihugu no hanze yacyo.

Hanashimwe byumwihariko kuba RADIO IZUBA iha ijambo abaturage,ikaba inafite gahunda yo kwigisha abana ibyikoranabuhanga,ritanisoba abanyamakuru ubwabo. Iyi RADIO yabaturage muri bo rwagati ikaba ari nayo RADIO ya mbere yabaturage yigenga mu RWANDA,Abanyamakuru bayo bagaragaje bimwe mubyo babona byashyirwamo imbaraga kugirango akazi kabo kaburi munsi karusheho kugenda neza, aha hakaba havuzwe ku gitekerezo kiriho cyo kuba hagurwa imodoka yafasha abanyamakuru kurushaho kugera ku isoko yinkuru,hanashimangirwa gahunda RADIO IZUBA ifite yo gukora hagenderwa ku buryo bwumwuga witangazamakuru.

Ubuyobozi bw’ADECCO  bwijeje abanyamakuru imikoranire yahafi no kugerageza gukorana inama kenshi ,kugirango bungurane ibitekerezo kucyakorwa hagamijwe iterambere rya Radio n’abakozi bayo. Mu mezi atarenga 2  iyi commite nshya ya ADECO imaze itowe ni ku ncuro ya kabiri ihuye nabakozi ba RADIO IZUBA ikaba yanabijeje ko ibiganiro nkibi bizahoraho mu rwego rwo kugira ngo baba abanyamakuru bakora akazi umunsi ku munsi ka RADIO,baba abayobozi bayo ndetse n'ubuyobozi bwa ADECO bahore bungurana ibitekerezo hagamijwe ko uwari intumbero yiyi RADIO ishingwa ari we muturage amakuru amugereho kandi abigizemo uruhare hanagamijwe ko ahabwa ijambo binyuze muri uyu muyoboro wa RADIO ahagaragarizwa ibitekerezo byuyobora n'uyoborwa mu kwimakaza imiyoborere myiza.

 

admin's picture

Kugira umurimo ukora niyo ntambwe ya mbere ku rubyiruko

Ngoma

Bamwe  mu rubyiruko rukora  imyuga  itandukanye  irimo   ubukanishi,kudoda  no  kubaza, batangarije  Radio  Izuba    icyo  iyi myuga  ibafasha  mu buzima  bwabo  bwa  burimunsi aho  bagaragaza  ko  bibaha  icyizere  cy’ubuzima  bw’ejo  hazaza. Uru  rubyiruko  kandi  rukaba  rutangaza ko   na  bagenzi  babo  batagira  icyo  bakora  bakwiye   kwigirira  icyizere     bashaka  icyabateza  imbere   mu kwihangira  imirimo  birinda   ingesombi  zirimo  uburaya  ,ubujura, gukoresha ibiyobya  bwenge   ndetse  nizindi  ngeso  mbi  zababuza  amahirwe  yabo. Uru  rubyiruko  rukaba  rusaba  kandi  bagenzi  barwo  kutagira  umurimo   basuzugura   uko  waba  uri  kose.

Umuyobozi  uhagarariye  urubyiruko  mu  karere  ka  Ngoma    bwana   Rutagengwa  Bosco   akaba  yatangarije  Radio  Izuba  ko  hategurwa  amahugurwa    kurubyiruko  mu kwigishwa  uko  bakwihangira  umushinga  uzabateza  imbere,uyu muyobozi  kandi  akaba  asaba  uru rubyiruko    kwirinda  ibyababuza  amahirwe  bagakora   ibibahesha  agaciro.

 

Habanabakize Jean Chrisostome / Radio Izuba

 

Muyumbu: Agahimbazamusyi kubakora amatelasi ntigahagije

terrasse

Ubwo  twageraga mu isambu irimo gukorwamo amatelasi yindinganire mu karere ka Rwamagana  mu murenge wa Muyumbu akagari ka Murehe . Abakozi twasanze   muri iyi mirima  bashishikariye gukora, batubwiye ko ayo masambu bari gukora harimo nayabo yahozemo intoki n’ibindi bihingwa bitandukanye.

Nyirahabimana Odette  ni umwe mu bakozi twaganiriye badutangarije ko ubuzima butaboroheye kuko insimburamubyizi bahabwa ikiri hasi bakaba basaba ko bayongera kugira ngo ubuzima bubashe kugenda neza yagize ati: “ amafaranga ibihumbi bibiri duhebwa ntago ahagije kuko nk’umuntu wari umenyereye gutungwa nibyo guhinga nago ibihumbi bibiri byahaza umuryago bishobotse bazamura iyi nsimburamubyizi kugirango ubuzima bubashe kugenda neza” Ndagijimana Innocent  nawe ni umuturage twasanze aho  nubwo ashima iyi gahunda yabashyiriweho , arasaba ubuyobozi ko bwababa hafi kugira ngo ayo masambu yabo asabyazwe umusaruro nkuko bikwiye  yagize ati:” ubuyobozi ibyo badukoreye ni byiza ariko ndasaba ko ubuyobozi bukurikiranira hafi ishyirwa mu bikorwa byiyi gahunda , bakamenya ko iyi mirima  itagomba kurazwa ikabyazwa umusaruro

Umunyamabanga nshingwabikorwa w’umurenge wa Muyumbu bwana Mushindaji Fred  ubwo yaganiraga na radio izuba yadutangarije ko iyo gahunda yashyiriweho abaturage kugira ngo hongerwe umusaruro , ikindi kandi ngo ni mu rwego byo kwirida Ibiza birimo kugaragara muri ino minsi bafata ubutaka banarwanya isuri itwara ubutaka bahingaho umusaruro nuboneke.ubuyobozi bwasabye  abaturage kutantangira  kandi abatekinicien basabye kutagira umuturage bahohotera icyi gikorwa cyo gukora amatelasi yindinganire kizakorerwa ku buso  bwa ha 350 . ni muri gahunda yo guhuza imikoreshereze y’ubutaka muri gahunda yo guhinga igihingwa kimwe cy'ibigori.

 

Hakizayezu David  /  Izuba Radio

 

 

 

admin's picture

I Ngoma Ubujura bwafashe indi ntera

ngoma district

Mugihe ubujura bwo mungo bukomeje kwiyongera hirya no hino mu turere abaturage baremeza ko habaye kudohoka mu gukora amarondo,ariko bakaba banatangaza ko hamwe n'ubuyobozi bw’imidugudu bahagurikiye gukaza amarondo kugirango bahangane n'ubwo bujura  bukabije.

Rdio Izuba yifuje kumenya imiterere y'icyo kibazo,aho yaganiriye n'abaturage bo mu midugudu itandukanye yo mu akagari ka karenge ndetse na Cyasemakamba. Abaturage benshi baritotombera ubwo bujura aho bavuga ko abo bajura  baza kwiba  nijoro baryamye, bakaba bakunda gutwara ibikoresho byo mungo,amatungo magufi, matera ndetse ni bindi

Abo baturage basanga ahanini ubujura buterwa n'uko amarondo yadohotse kandi usanga  hari n’abantu baboneka nijoro ariko ugasanga batazwi neza ,n’ubuyobozi bwumudugudu ni nayo mpanvu hafashwe ingamba zo gukaza amarondo mu nama yumutekano bagiranye n'ubuyozi bw'imidugudu kuri uyu wagatandatu.Ubuyobozi bwakagari ka  karenge bwo burashishikariza abaturage kwicungira umutekano bakaza amarondo kandi bakagira umucyo wo kumenyekanisha abashyitsi baraye mu ikayi  y’abinjira n’abasohoka. Murwego rwo kurwanya ubwo bujura abadashoboye gukora amarondo barasabwa gutanga insimbura mubyizi kugirango hahembwe abakoze kuri uwo munsi aha higanjemo abakozi nabandi bantu batabishoboye.

 

Edith Nibakwe  /  Izuba Radio

 

admin's picture

Abagororwa bagera kuri 13 babatirijwe i Ngoma

ngoma

Ni ku gicamunsi kuri uyu wa gatandatu ,ubwo abagororwa 13 bafungiye muri gereza ya Kibungo, bahinduye idini babatirizwa mu mazi menshi mu idini y’abadivantisiti b’umunsi wa 7, nyuma yo kwigishwa isomo rirerire bahawe na Pastieri Ndahiriwe Eriyeri wabakanguriye kwicisha bugufi mu byo bakora byose, bagakunda bagenzi babo nkabo ubwabo, kandi bagashyira imbere ukwizera kuko ariyo ntwaro y’umukirisito nyawe, Pasiteri  Eriyeri kandi yahaye ubutumwa ababatijwe arabasaba  guhora barwanya satani kuko ahora abugarije ashaka uko yabagusha mu cyaha, yababwiye ko ubukirisitu ari urugamba rukomeye cyane.

Abantu bagicumbagira mu bukirisitu bo yabasabye kwihangana bakarwanya ikibi buhoro buhoro bazagitsinda. Inyigisho nk’izi n’imibatizo abadivantisiti barabikorera hirya no hino mu gihugu , ngo bagamije guhindura abantu bakaba abo bagomba kuba bo.

Ntwali Aloys Gonzague / Izuba Radio

 

admin's picture

Abanyeshuri bo muri Apeki Amizero bahawe impamyabumenyi

Apeki

Abana 19 bo mu ishuri Apeki Amizero Primary School  ry’I Nyakarambi mu karere ka Kirehe bambaye ikanzu igaragaza ko barangije umwaka wa gatatu w’amashuri y’inshuke banahabwa impamyabumenyi, bakaba bagiye gutangira amashuri abanza mu kwa mbere kwa 2013. Umuyobozi w’iri shuri Mutumwinka Aunick, yatangaje ko imyaka itatu bamaze bigiyemo byinshi birimo no gutinyukana ikinyabupfura. Arasaba ababyeyi kwitabira gushyira abana babo mu mashuri y’inshuke kuko ariho bavana uburere bw’ibanze.

Umwe mu babyeyi b’aba bana Ayinkamiye Verediyana aremeza ko uburere bw’abana babo babugiramo uruhare akaba asaba ababyeyi batererana abana bakabaharira mwarimu kwikubita agashyi bagafatanya  n'abarimu kurera.Umwari Joy wari uhagarariye aba bana yasabye bagenzi be kwiga bashyizeho umwete kugirango bazabe abo bagomba kuba bo.


Ntwali Aloys Gonzague  /  Izuba  Radio

 

admin's picture

Lycée ya Zaza yatoye Nyampinga 2012

 

 

Umukobwa witwa Nemeye Umwari Lisa niwe watorewe kuba Nyampinga mu Ishuri ryisumbuye rya Lycée ya Zaza,mu Karere ka Ngoma, ku wa kabiri tariki ya 6 Ugushyingo 2012. Iri shuri rikaba ari ryo ryabaye irya mbere mu mashuri yisumbuye yo mu Ntara y’Uburasirazuba mu gutora Nyampinga w’Ishuri.Iki gikorwa kikaba cyarakorewe hamwe no kwizihiza umunsi mpuzamahanga w’Umwana w’Umukobwa, iri shuri ritabashije kwizihiza dore ko ubundi wizihijwe tariki ya 11 Ukwakira .Mu ijambo rye, Soeur Umugwaneza Marie Goretti uyobora Ishuri rya Lycée ya Zaza yatangarije Radio Izuba  ko intego z’iki gikorwa ari ukurwanya ihohoterwa rikorerwa Abana b’abakobwa , no guteza imbere umuco nyarwanda hashingiwe ku bumenyi n’ubwenge.

 

 

Kugera ku mahirwe ya nyuma, Abakandida batandatu nibo bari basigaranye  amahirwe yo gutorerwa  kuba Nyampinga. Abo ni CANIRINKADenyse, USANASE Aline,UMUHOZA Immaculée,Kaneza Yvan, UMUBYEYI  Clémence, na NEMEYE UMWARI Lisa. Uyu NEMEYE UMWARI Lisa niwe wegukanye umwanya wa Nyampinga wa Lycée ya Zaza umwaka wa 2012. Avugana na Radio Izuba, NEMEYE UMWARI  Lisa yatangaje ko azafasha bagenzi be mu kwigirira icyizere , kugaragaza impano bafite babinyujije muri Club TUSEME no mu bihangano,gushyigikira umuco nyarwanda no kuba umuhuza hagati y’Abarezi n’Abanyeshuri.

 

 

Umuyobozi wa Lycée ya Zaza Soeur UMUGWANEZA  Marie Goretti yahaye by’umwihariko Nyampinga inshingano yo kuzabyutsa Club TUSEME ifasha abanyeshuri kumenya gutanga ibitekerezo byabo binyujijwe mu nzira z’ubuhanzi. Nyampinga Nemeye Umwari Liza yiga mu mwaka wa Kane, Imibare, Ubukungu n’Ikoranabuhanga. Akomoka mu Mujyi wa Kigali, Akarera ka Gasabo Umurenge wa Kimironko.Babiri bamugaragiye ni KANEZA Yvan, ariwe gisonga cye cya mbere, na  UMUHOZA Immaculée , igisonga cye cya kabiri.

 

 

Iki gikorwa kikaba cyarateguwe kandi kigashyirwa mu bikorwa na Club y’Itangazamakuru y’Abanyeshuri-MEDIA CLUB-y’Abanyeshuri ba Lycée ya Zaza bafatanyije n’Ubuyobozi bw’Ishuri. Iyi  MEDIA CLUB igizwe n’Abanyeshuri 25. Uretse gutangaza Amakuru buri gitondo ku iperu ry’Abanyeshuri, yandika n’Agatabo kitwa The Eastern Light  biteganijwe ko gasohoka buri kwezi. Kamaze gusohora inimero imwe gusa.

 

 

DUSABUMUREMYI Narcisse / Izuba Radio

 

 

 

admin's picture

Fata igiti cyose nk’icyawe ni intego y’abagore ba Kirehe na Ngoma.

rema

Abahagarariye inamay’igihugu y’abagore bo mu turere twa Ngoma na Kirehe biyemeje guhangana no guhashya ingaruka ziterwa n’ibiza biyemeza gutera amashyamba banakoresha uburyo bwo guteka bakoresha bio gaz.

Iki cyemezo bagifashe nyuma y’ibiganiro nyungurana bitekerezo bahawe nikigo cy’igihugu gishinzwe kubungabunga ibidukikije (REMA), Mukamusoni Virginie ahagarariye inama y’igihugu y’abagore mu karere ka Ngoma yatangarije Radio Izuba ko yiteguye gukangurira bagenzi be gutegura pepeniyeri z’ibiti nyinshi bakabitera muri iri hinga kandi bakabyitaho kugeza bikuze, Virginie kandi ngo yiteguye no kubikangurira abana babo bagakura bazi akamaro k’ibiti.

Irutingabo Ange ni umukozi w’ikigo cy’igihugu cyita ku bidukikije (REMA), Umwe mu batangaga ibi biganiro yavuze ko impamvu batoranyije abagre gusa ari uko aribo bahura cyane n’ibintu bishobora gutera Ibiza nk’igihe batetse bakoresha inkwi bohereza imyotsi mu kirere, ibi byose bikaba byatera Ibiza, mu gihe rero abagore babizi biroroshye kubikumira no kumenya guhangana n’ingaruka z’ibiza. Umuyobozi w’akarere ka Ngoma Nambaje Afrodise yasabye aba bagore kwiha intego igira iti: “fata igiti cyose nk’icyawe” aha yashakaga kuvuga ko igiti aho kiri hose akamaro kagifitiye buri muntu ahari hose niyo mpamvu buri muntu agomba kugifata neza aho kiri hose, arakomeza agira ati, iyo igiti gitanga uwuka mwiza bahumeka (oxygene) kitawuha uwagiteye gusa ahubwo ni umuntu wese uri ku isi, abitabiriye ibi biganiro bahavuye iyi ntego bayigize iyabo.

 

NTWALI Aloys Gonzague / Izuba Radio

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

admin's picture

Ibiti bya Kabaruka abaturage babimariye i bugande.

parc

Ibi biti babigurisha abantu babijyana I Bugande aho babicisha mu nganda bakabivanamo za parfum ni amavuta ahumura cyane abantu bisiga ku mubiri no mu myenda. Aba baturage usanga barabigize umwuga ku buryo abakoraga umwuga w’ubuhinzi ubu babiretse bagana  iyo ishyamba kurimbura kabaruka, umwe muri aba bagabo witwa Ndungutse Jean Caude aremeza ko bavanamo amafaranga menshi kuko ikiro kimwe bahabwa F250 kandi hari n’abarimbura ibiti bipima ibiro 50.

Ikibabaje ni uko aho barimbuye ibi biti hasigara hameze nk’ubutayu kandi aho kivuye ntigishibuka nk’uko bitangazwa na Nzwinimana Philbert ushinzwe ubutegetsi n’imari mu isosiyete ibungabunga pariki y’Akagera (AMC) Akagera Management Company, arakomeza avuga ko abacunga pariki bahagije akaba asaba abaturage bagifite gahunda yo kuvogera iyi pariki koga magazi kuko amazi Atari ya yandi. N’ubwo kandi hafashwe abantu barindwi gusa, abandi birutse barabacika ngose hamwe bageraga kuri 50. Umuyobozi wa pariki y’Akagera Mutangana Eugene we aremeza ko bafite ingamba zikomeye zo kurinda ibi bimera bibanda cyane ku bukangurambaga ku bayobozi b’ibanze kuko ngo hari n’abakuru b’imidugudu bagurisha za kabaruka kandi aribo ahubwo bagombye gukumira ubu bugizi bwa nabi.

Nk’uko bigaragara mu itegeko rirebana n’amapariki mu Rwanda, umuntu uvanye inyamaswa cyangwa ikindi kintu cyangwa se akagishyiramo akivanye hanze ahanishwa igifungo kiri hagati y’amezi 2 n’imyaka 2 n’ihazabu y’amafaranga ari hagati ya F 300.000 na F 2.000.000, cyangwa kimwe muri ibi bihano.

 

NTWALI Aloys Gonzague / Izuba Radio

 

 

 

 

 

 

 

admin's picture

Abanyamakuru ba Radio Izuba baratyaza ubwenge i Nairobi muri Kenya

kenya

Umunyamakuru agomba gutangaza amakuru kubijyanye n’ingengo y’imari nawe yamaze kuyisobanukirwa neza ndetse n’ibiyikubiyemo. Ibibikaba aribyo abanyamakuru baturutse mu bihugu 5 bigize umuryango w’afurika y’iburasirazuba (EAC)  bariguhugurwa I Nairobi muri Kenya.

Ayamahugurwa akabayarateguwe n’umushinga w’abadage uteza imbere umwuga w’ itangazamakuru (IIJ) International  Institute of Journalism of GIZ yitabiriwe n’abanyamakuru 15 baturutse mu bihugu 5 bigize EAC  Kenya, Tanzania, Burundi,Ugandan’U Rwanda, barungurana ibitekerezo ku Ngengo y’Imari , ituruka he ishyirwa mu bikorwa gute ndetse n’imbogamizi zishobora kugaragara n’uburyo umunyamakuru yabyitwaramo mu gihe agiyegutangaza inkuru ye.

Ikindi n’ukurebera hamwe uko watangaza inkuru mu gihe igihugu cyawe ubukungu bwamanutse kugirango abaturage basobanukirwe impamvu yabyo.

Bamwe mu banyamakuru bagaragaje bagaragaje impungenge kohari igihebategura inkuru kandi bayicukumbuye kubijyanye n’imikoreshereze y’ingengo y’Imari ariko abayobozi babo bakanga kobayitangaza bikaba aribimwe bishobora gusubiza inyuma umwugawabo. Ariko nyuma yo kubyunguranaho ibitekerezo bikaba byagaragaye ko biterwa n’umurongo igitangazamakuru kigenderaho mu bijyanye no gutangaza amakuru.

 

Twababwirako aya mahugurwa agomba kumara ibyumweru 2 U Rwanda rukaba ruhagarariwe n’abanyamakuru 2 ba Radio Izuba.

 

 Mushumba Bruce  /  Izuba Radio - Kenya - Nairobi

 

                                                                        

 

admin's picture

RADIO IZUBA muri comite ya EACOMNET

sengerema

Iyi comite yashyizweho kuri uyu wa gatatu n'abanyamakuru bakorera amaradio y'abaturage bateraniye i sengerema ni mu gihugu cya Tanzania nyuma yo gutangiza Ihuriro  EACOMNET  (Easterafrica community media network ).

Iyi comite igizwe na Eric KAYIHURA wa radio izuba yo mu Rwanda ,J.Pierre ABIJURU wa Radio ishingiro yo mu Rwanda ,JIM  Okello Radio APAC  Uganda , Kalanzi Laurence Radio Mama F.M Uganda ,Mwende Faith Kenya community media network Kenya ,Rauben MUKINDI  radio Mangelet Kenya , Joseph SEKIKA wa FADECO Tanzania ,na  Felician Tcthey  Uyoboye telecentre ya sengerema .

Mu byo iyi comite igiye gukora byihutirwa harimo gushyiraho urubuga rwa internet ruzahuza  ibitangazamakuru by’abaturage bikorera mu karere ka  Afurika y’I burasirazuba .Ibi byose bakazabigeraho bafatanyije n’umuryango  w’abibumbye  wita ku burezi ,umumenyi ,umuco n’ikoranabuhanga UNESCO . Ibi biganiro bihuje abanyamakuru bakorera  amaradio y’abaturage  mu karere ka afurika y’I burasirazuba  birasozwa kuri uyu wa gatanu .

Theoneste  Nkurunziza / Izuba Radio - Tanzania

admin's picture

One stop border post ni igisubizo ku iterambere

mukaruliza

Ubwo abayobozi batandukanye bageraga ahari kubakwa ibikorwa remezo mu rwego rwo gushyiraho gasutamo imwe aribyo byiswe”one stop border post “ihuriweho n’ibihugu by’u Rwanda na Tanzania  basanze ibikorwa biri kugenda neza. Mumbogamizi zagaragajwe nabari kubaka nuko ku ruhanze rwa Tanzania nta mashanyarazi bafite ibyo bikaba bidindiza imirimo.

Munyashongore Honore umukozi ukora mu kigo cy’igihugu gishinzwe guteza imbere gutwara abantu n’ibintu uri gukurikiranira hafi icyo gikorwa yadutangarije ko imirimo iri gukorwa neza kuko nikibazo cy’abaturage bahuye nacyo mbere ubu cyacyemutse yagize ati”kugeza uyu munsi imbogamizi twagiye duhura nazo ni igikorwa cyo kwimura abaturage ariko cyikaba cyararangiye ubu navuga ko imirimo uko yateganijwe iri  gukorwa neza ubu hari gukorwa imihanda no gusiza aho amazu ya gasutamo azubakwa” Umuyobozi wa karere ka kirehe bwana Murayire Protain yasabye minisitiri Mukaruliza  ko  hategurwa  inama kugira ngo harebwe uburyo imyanzuro yajya mu bikorwa kugira ngo umupaka ubashe kugira umutekano kandi hakajyaho itsinda rikora igenzura.

Minisitiri muri minisiteri y’umuryango wa afurika y’iburasirazuba madame Mukaruliza Monique yadutangarije ko yari mu gikorwa cyo kureba aho amasezerano yo gushyiraho gasutamo imwe igeze ishyirwa mu bikorwa.  Ngo yasanze ibikorwa bigeze kure ku ruhande rwu Rwanda. ibi bikorwa bikaba biri gukorwa mu rwego rw’icyumweru cyahariwe umuryango wa afurika y’iburasirazuba .  ku bibazo byagaragajwe nabari kubaka biri  ku ruhande rwa Tanzania minisitiri akaba yadutangaarije ko bagiye kuvugana n’ubuyobozi bireba mu gihugu cya Tanzania kugira ngo ibibazo bigihari birebe uburyo byakemuka kuko ari umushinga ufitiye ibihugu byombi akamaro,yagize ati”tuzavugana n’ubuyobozi bireba muri Tanzaniya kuko ni umushinga ufitiye akamaro ibihugu byombi.

Nkuko mwabibonye hano ni ahantu haca  amakamyoarenga  ijana ku munsi murumva ko ari inzira dukoresha cyane. Hagomba  kwitabwaho kugirango ubuhahirane burusheho gutera imbere hagati y’u Rwanda na Tanzania ndetse no hagati y’u Rwanda n’ibindi bihugu biri hanze y’umuryango wa afurika y’iburasirazuba”Uyu mushinga watangiye mu kwezi kwa karindwi muri uno mwaka wa 2012 ukaba uzarangira mu kwezi kwa cumi na kumwe 2014 uzatwara akayabo ka miriyari 25  z’amafaranga y’u Rwanda.

 

HAKIZAYEZU David  / Izuba Radio

RADIO IZUBA muri comite ya EACOMNET

sengerema

Iyi comite yashyizweho kuri uyu wa gatatu n'abanyamakuru bakorera amaradio y'abaturage bateraniye i sengerema ni mu gihugu cya Tanzania nyuma yo gutangiza Ihuriro  EACOMNET  (Easterafrica community media network ).Iyi comite igizwe na Eric KAYIHURA wa radio izuba yo mu Rwanda ,J.Pierre ABIJURU wa Radio ishingiro yo mu Rwanda ,JIM  Okello Radio APAC  Uganda , Kalanzi Laurence Radio Mama F.M Uganda ,Mwende Faith Kenya community media network Kenya ,Rauben MUKINDI  radio Mangelet Kenya , Joseph SEKIKA wa FADECO Tanzania ,na  Felician Tcthey  Uyoboye telecentre ya sengerema .Mu byo iyi comite igiye gukora byihutirwa harimo gushyiraho urubuga rwa internet ruzahuza  ibitangazamakuru by’abaturage bikorera mu karere ka  Afurika y’I burasirazuba .Ibi byose bakazabigeraho bafatanyije n’umuryango  w’abibumbye  wita ku burezi ,umumenyi ,umuco n’ikoranabuhanga UNESCO . Ibi biganiro bihuje abanyamakuru bakorera  amaradio y’abaturage  mu karere ka afurika y’I burasirazuba  birasozwa kuri uyu wa gatanu .Theoneste  NKURUNZIZA 



Main menu 2

by Dr. Radut